હે ભગવાન..નોટો રાખવાની જગ્યા નથી ! આવકવેરાને કોંગ્રેસ સાંસદ પાસેથી અત્યાર સુધી કેટલી મળી રોકડ ? જુઓ

આંકડો 500 કરોડ સુધી પણ જઈ શકે છે, આવકવેરાની ટીમ ઝવેરાતની 3 બેગ ભરી ગઈ, દેશમાં અત્યાર સુધીની સૌથી મોટી રોકડની જપ્તી

વોઇસ ઓફ ડે નવી દીલ્હી

ઝારખંડ કોંગ્રેસના સાંસદ સાહુને ત્યાં આવકવેરાની રેડ 4 દિવસથી ચાલી રહી છે અને સાહુના 10 જેટલા ઠેકાણા પર રેડ દરમિયાન રૂપિયા 290 કરોડ મળ્યા હતા અને ભારતની આ સૌથી મોટી રોકડ જપ્તી ગણાય છે. અધિકારીઓએ એવી માહિતી આપી હતી કે રોકડનો આંકડો 500 કરોડ સુધી જઈ શકે છે. હજુ નોટોની અનેક બેગની ગણતરી બાકી છે.

દરોડામાં કબજે થયેલી નોટો ગણવા માટે મશીન આવ્યા હતા પણ તે બગડી ગયા હતા. ચોથા દિવસે પણ 40 જેટલી બીજી મશીનો નોટ ગણી રહી હતી. આ ઉપરાંત આવકવેરાને સાહુ પાસેથી મળેલા ઘરેણાં પણ એટલી સંખયામાં હતા કે 3 બેગ ભરવી પડી હતી. નોટો ગણવા માટે બેન્કના કર્મીઓને બોલાવાયા હતા. કર્મીઓની સંખ્યા વધારી દેવાઈ છે.

દરમિયાનમાં એસબીઆઇના અધિકારી ભગત બોહરાએ મીડિયાને એવી માહિતી આપી હતી કે નોટોના 176 બેગ અમને મળ્યા છે અને 40 બેગની ગણતરી થઈ ગઈ છે. જપ્ત કરાયેલી નોટોને રાજ્ય સરકારની બેન્કો સુધી પહોંચાડવા માટે વધુ વાહનોની માંગણી કરવામાં આવી છે.

અધિકારીઓએ કહ્યું હતું કે 136 જેટલી નોટો ભરેલી બેગની ગણતરી હજુ પણ બાકી છે અને આંકડો 500 કરોડ સુધી જઈ શકે છે. મોટા ભાગે બેગોમાં રૂપિયા 500 ની જ વધુ નોટો છે. દેશમાં અત્યાર સુધીમા રેડ દરમિયાન જપ્ત કરાયેલી સૌથી મોટી રોકડ છે અને હજુ તેનો આંક વધી શકે છે.