ગુજરાતનું જામનગર હવે માત્ર રિફાઈનરી માટે નહીં, ‘આર્ટિફિશિયલ ઇન્ટેલિજન્સ’ માટે પણ જાણાશે. મેટાના સીઈઓ માર્ક ઝુકરબર્ગે ભારતમાં પહેલું AI ડેટા સેન્ટર જામનગરમાં ખોલવાની મોટી જાહેરાત કરી છે. રિલાયન્સ ઇન્ડસ્ટ્રીઝ સાથે હાથ મિલાવીને મેટા તેના ‘પર્સનલ સુપરઇન્ટેલિજન્સ’ વિઝનને ભારતની ધરતી પરથી આગળ ધપાવશે.
ફેસબુક, ઈન્સ્ટાગ્રામ અને વોટ્સએપની પેરેન્ટ કંપની મેટાએ ભારત માટે મોટી જાહેરાત કરી છે. કંપની ભારતમાં પોતાનું પહેલું આર્ટિફિશિયલ ઇન્ટેલિજન્સ ડેટા સેન્ટર સ્થાપશે અને તેના માટે જામનગરની પસંદગી થઈ છે. આ પ્રોજેક્ટ માટે મેટાએ મુકેશ અંબાણીની રિલાયન્સ ઇન્ડસ્ટ્રીઝ સાથે ભાગીદારી કરી છે.
કોણ શું કરશે?
અહેવાલો મુજબ જામનગરમાં ડેટા સેન્ટરના નિર્માણની આખી જવાબદારી રિલાયન્સની રહેશે. રિલાયન્સ આ પ્રોજેક્ટમાં એન્ડ-ટુ-એન્ડ સેવા આપશે. જેમાં ડેટા સેન્ટરની ડિઝાઇન, ડેવલપમેન્ટ, ગ્રીન અને રિન્યુએબલ એનર્જીનો સપ્લાય અને હાઈ-સ્પીડ નેટવર્ક કનેક્ટિવિટી સામેલ છે. ઇન્ફ્રાસ્ટ્રક્ચર તૈયાર થયા બાદ મેટા પોતાની ટેક્નોલોજી ઇન્સ્ટોલ કરીને કામગીરી શરૂ કરશે. આ સેન્ટર મેટાની ગ્લોબલ AI સિસ્ટમ્સને મજબૂત કરશે જે ફેસબુક, ઈન્સ્ટા અને વોટ્સએપને પાવર આપે છે.
આ પણ વાંચો: હજારો કિલોમીટર દૂર દરિયાનું વધતું જતું તાપમાન ભારતમાં સર્જશે આર્થિક તબાહી
ક્યારે શરૂ થશે અને કેટલી ક્ષમતા?
આ મેગા પ્રોજેક્ટ આગામી બે વર્ષમાં સંપૂર્ણ રીતે કાર્યરત થઈ જશે તેવી અપેક્ષા છે. શરૂઆતમાં આ AI ડેટા સેન્ટરની ક્ષમતા 168 મેગાવોટ રાખવામાં આવી છે.
ભારતને શું ફાયદો?
આ ડેટા સેન્ટરથી ભારતના રાષ્ટ્રીય AI મિશનને મોટો વેગ મળશે. ભારતીય યુઝર્સ માટે ડેટા પ્રોસેસિંગની સ્પીડ વધશે, જેનાથી ફેસબુક, ઈન્સ્ટા અને વોટ્સએપનો અનુભવ વધુ સ્મૂધ બનશે. ટેક ક્ષેત્રે મોટી સપોર્ટ સિસ્ટમ ઊભી થશે અને હજારો નોકરીઓનું સર્જન થવાની શક્યતા છે.
રિલાયન્સ માટે મોટી છલાંગ
આ ડીલ સાથે રિલાયન્સ ઇન્ડસ્ટ્રીઝ ભારતમાં હાઇપરસ્કેલ AI ઇન્ફ્રાસ્ટ્રક્ચર માર્કેટમાં સિંગલ-વિન્ડો સોલ્યુશન પ્રોવાઈડર બની જશે. એટલે કે ગ્રાહકોને ડેટા સેન્ટરની બધી જ મુખ્ય સેવાઓ એક જ કંપની પાસેથી મળી જશે. ઝુકરબર્ગનું ‘સુપરઇન્ટેલિજન્સ’ અને અંબાણીનું ‘ઇન્ફ્રાસ્ટ્રક્ચર’ – આ જુગલબંધી જામનગરને ભારતનું નવું AI હબ બનાવશે.
