રાજકોટના મવડી વિસ્તારમાં ઝેપ્ટોના કર્મચારીઓએ પગાર બાબતે કંપનીના બે અધિકારીઓને ફટકાર્યા
ઓનલાઇન એપ્લિકેશન મારફતે ડોર ટુ ડોર દૈનિક જીવન જરૂરિયાત સહિતની વસ્તુ પહોંચાડતી ઝેપ્ટો કંપનીના મવડી સ્ટોર પર પગાર વધારાની માંગ સાથે કેટલાક કર્મચારીઓ ધારણા પણ બેઠાં હતા. બે દિવસ બાદ પણ આ મુદે કોઈ સમાધાન ન થતાં કંપનીએ આઠ કર્મચારીને છુટા કરી દેતા કર્મચારીઓએ સ્ટોરમાં ગેરકાયદેસર ઘુસી બે અધિકારીઓને માર મારતા તાલુકા પોલીસ મથકમાં ફરિયાદ નોંધાઈ છે.
આ પણ વાંચો : રાજકોટની સૂર્યકાંત હોટલના માલિક સામે નોંધાયો ગુનો : રાજસ્થાનના વેઈટરને નોકરીએ રાખ્યા બાદ નોંધણી ન કરાવતાં SOGની કાર્યવાહી
ઝેપ્ટો કંપનીના લીગલ મેનેજર હરેશકુમાર બાબુલાલ ગોહેલ ( રહે. વિજયપાર્ક, સાણંદ) દ્વારા રાજકોટ તાલુકા પોલીસ મથકમાં નોંધાવેલી ફરિયાદમાં જણાવ્યું હતું કે, તેઓ ગુજરાતમાં આવેલી તમામ ઝેપ્ટો કંપનીના સ્ટોરની લીગલ મેનજર તરીકે ફરજ બજાવે છે. રાજકોટના મવડી વિસ્તારમાં બાપાસીતારામ ચોક નજીક આવેલી વન બિલ્ડિંગમાં કંપનીનો સ્ટોર આવેલ છે અહીં સ્ટોર મેનેજર તરીકે સુરેશ શર્મા જ્યારે સિક્યુરિટી મેનેજર તરીકે મનીષકુમાર તોમર ફરજ બજાવે છે. આ સ્ટોરમાં કામ કરતા ડિલિવરી બોય ગત તારીખ 2/6 ના પગાર વધારવાની માંગ સાથે સવારથી કામ કરવાનું બંધ કરી દીધું હતું. જે બાદ મેનજર સુરેશ શર્માએ તમામ કર્મચારી સાથે એજ દિવસે મિટિંગ કરી પગાર વધારી દીધો હોય છતાં ડિલિવરી બોયને અસંતોષ હોય રહ્યો હતો અને કામ ચાલુ કરેલું ન હતું. આ સ્થિતિમાં તમામ આઠ કર્મચારીઓને કંપની માંથી છુટા કરી દેવામાં આવ્યા હતા.
આ પણ વાંચો : બાળકોના ફેવરિટ એવા રેસકોર્સની દયનીય હાલત તો જુઓ ! કસરત માટે સાધનો, બેસવા માટે બાકડા ગાયબ
બીજા દિવસે ફરિયાદી રાજકોટ આવેલ ત્યારે નોકરી પરથી છુટા કરી દીધેલા ડિલિવરી બોય સ્ટોરની બાહર ધારણા પર બેઠા હતા. દરમિયાન સાંજના સમયે મહેશ ઘુસાભાઈ, મહેશ માધડ, સદાડીયા આકાશ, જયદીપ રાતડીયા, કરણ ચૌહાણ, ધારૈયા બ્રિજેશ, પરેશ રાઠોડ, મયુર રાઠોડ, સહિતના બે અજાણ્યા શખસોએ અચાનક સ્ટોરનું શટર પાડી દીધું હતું.આ બાબતે સમજાવતા કેટલાક કર્મચારીઓએ અમે નીચી જ્ઞાતિના હોય એટલે હેરાન કરો છો તેવું કહેતા ફરિયાદીએ સમજાવ્યું હતું કે આ સ્ટોરમા બધી જ્ઞાતિના લોકો કામ કરે છે અને હું તમને ઓળખતો પણ નથી. તેવામાં કેટલાક કર્મચારીઓએ ગેરકાયદેસર રીતે સ્ટોરમાં ઘુસી બે અધિકારીઓને માર માર્યો હતો. જે બાદ અહીં હાજર અન્ય સ્ટાફે બંનેને વધુ મારથી બચાવ્યા હતા. બનવા અંગે તાલુકા પોલીસે આઠ સામે ગુન્હો નોધી વધુ તપાસ હાથ ધરી છે.
