VIDEO: રાજકોટના ભગવતીપરાના ત્રિશૂલ ચોકમાં હોલિકા દહન સમયે જ સ્કૂટર કાઢવા બાબતે માથાકૂટ,3 લોકોની પોલીસે કરી અટકાયત
રાજકોટમાં સોમવારે ઠેર-ઠેર હોલિકા દહન કરવામાં આવ્યું હતું જેમાં ભાવિકો દ્વારા પ્રદક્ષિણા સહિતની ધાર્મિક વિધિ કરાઈ હતી બરાબર આ જ સમયે શહેરના સંવેદનશીલ ગણાતાં ભગવતીપરાના ત્રિશૂલ ચોકમાં મુસ્લિમ યુવક સ્કૂટર લઈને પસાર થતાં હોલિકા દહન ચાલી રહ્યું હોય બીજી શેરીમાંથી સ્કૂટર લઈને જવાનું કહેતાં જ માથાકૂટ, હો-હા અને દેકારો થઈ જતાં સ્થિતિ વણસી ન જાય તે માટે ડીસીપી સહિતના અધિકારીઓ ઘટનાસ્થળે દોડી ગયા હતા અને મામલો થાળે પાડયો હતો. બીજી બાજુ માથાકૂટ કરનાર ત્રણ લોકોની અટકાયત કરી બી-ડિવિઝન પોલીસ મથક દ્વારા પૂછપરછ કરવામાં આવી હતી.
ત્રિશૂલ ચોકમાં હોલિકા દહન શરૂ થયા બાદ ભાવિકો હોળી ફરતે પ્રદક્ષિણા કરી રહ્યા હોય ઉપરાંત અન્ય લોકો દર્શનાર્થે આવ્યા હોવાથી મોટી સંખ્યામાં અહીં માણસો ભેગા થઈ ગયા હતા. બરાબર આ જ સમયે મુસ્લિમ યુવક સ્કૂટર લઈને પસાર થતાં તેના સ્કૂટરને પસાર થવા આડે જગ્યા ન હોવાથી ત્યાં હાજર વડીલો દ્વારા આ યુવકને સ્કૂટર હોલિકા પાસેથી કાઢવાની જગ્યાએ અન્ય શેરીમાંથી જવા માટે કહેવામાં આવતાં થોડીવાર બોલાચાલી થઈ હતી.
આ પણ વાંચો :સંગીત સેરેમનીમાં વિજય-રશ્મિકાનો ડાન્સ-રોમાન્સ: દિયર અને પરિવાર સાથે પણ કર્યું ધમાકેદાર પર્ફોમન્સ, કપલે શેર કરી તસવીરો
આ પછી થોડીવારમાં મુસ્લિમ યુવકોનું ટોળું સ્થળ ઉપર ઘસી આવતાં અહીં હાજર ભાવિકો પણ ઉશ્કેરાયા હતા અને સામસામી બોલાચાલી અને દેકારો થવા પામ્યો હતો. જો કે ઉપસ્થિત આગેવાનો જેમાં વોર્ડ નં.4ના કોર્પોરેટર કાળુભાઈ ફુગસીયા કે જેઓ પોતાની પુત્રીને લઈને હોલિકાના દર્શન માટે આવ્યા હોય તેઓ પણ દોડી ગયા હતા અને બન્ને પક્ષના યુવકોને છૂટા પડયા હતા. ઘટનાની જાણ થતાં જ ડીસીપી ક્રાઈમ જગદીશ બાંગરવા, ડીસીપી હેતલ પટેલ, ક્રાઈમ બ્રાન્ચ, એસઓજીની અલગ-અલગ ટીમે દોડી જઈને મોરચો સંભાળી લેતાં બનાવ વકરતા અટક્યો હતો. બીજી બાજુ બી-ડિવિઝન પોલીસ મથક દ્વારા પણ ત્રણ યુવકની અટકાયત કરવામાં આવી હતી.
