વેનેઝુએલાના રાષ્ટ્રપતિ ડેલ્સી રોડ્રિગ્ઝ પહોંચ્યા જામનગરના આંગણે

ગુજરાતના સાંસ્કૃતિક અને ઔદ્યોગિક નગર એવા જામનગરમાં આજે એક પ્રતિષ્ઠિત વૈશ્વિક મુલાકાત નોંધાઈ છે. બોલિવેરિયન રિપબ્લિક ઓફ વેનેઝુએલાના રાષ્ટ્રપતિ મહામહિમ ડેલ્સી રોડ્રિગ્ઝ આજે જામનગરની સત્તાવાર મુલાકાતે પધાર્યા હતા. આ હાઈ-પ્રોફાઈલ આંતરરાષ્ટ્રીય પ્રવાસને પગલે જામનગર એરપોર્ટ ખાતે વહીવટી તંત્ર અને અગ્રણી મહાનુભાવો દ્વારા પ્રોટોકોલ મુજબ તેમનું ભવ્ય અને પરંપરાગત શૈલીમાં ઉષ્માભેર સ્વાગત કરવામાં આવ્યું હતું.

એરપોર્ટ પર મહાનુભાવો દ્વારા સ્વાગત

વેનેઝુએલાના રાષ્ટ્રપતિના સ્વાગત અને પ્રોટોકોલ વ્યવસ્થા માટે એરપોર્ટ પર જામનગરના મેયર મોનિકા વ્યાસ, જિલ્લા કલેક્ટર પી.બી.પંડ્યા, જિલ્લા પોલીસ અધિક્ષક (SP) ડૉ. રવિ મોહન સૈની તેમજ વેનેઝુએલા ખાતે ભારતના રાજદૂત પી.કે. અશોક બાબુ ખાસ ઉપસ્થિત રહ્યા હતા. તમામ મહાનુભાવોએ પુષ્પગુચ્છ અર્પણ કરી રાષ્ટ્રપતિ મહામહિમ ડેલ્સી રોડ્રિગ્ઝનું જામનગરની ધરતી પર સ્વાગત કર્યું હતું.

આ પણ વાંચો: પુતિને ભારતને આપી સૌથી શક્તિશાળી ઓફર, ચીન-પાક. સહિત અમેરિકાની ચિંતા વધી

પ્રાદેશિક વાહન વ્યવહાર કચેરી (RTO) ખાતે ગ્રીન મેસેજ

એરપોર્ટ પર ઔપચારિક સ્વાગત વિધિ પૂર્ણ થયા બાદ વેનેઝુએલાના રાષ્ટ્રપતિ જામનગરની પ્રાદેશિક વાહન વ્યવહાર વિભાગની કચેરી (RTO) ખાતે પહોંચ્યા હતા. આજે “વિશ્વ પર્યાવરણ દિન” નો પવિત્ર અવસર હોઈ, તેમણે આ દિવસને યાદગાર બનાવવા માટે આર.ટી.ઓ. કચેરીના પ્રાંગણમાં સ્વહસ્તે વૃક્ષારોપણ કર્યું હતું.

આ પ્રસંગે ગ્રીન ગ્લોબલ મેસેજ આપતા પ્રકૃતિના જતન પર ભાર મુકાયો હતો કે, વૃક્ષો માત્ર પર્યાવરણીય સંતુલન અને ગ્લોબલ વોર્મિંગ સામે લડવામાં જ નહીં, પરંતુ સમગ્ર માનવજાતને શુદ્ધ પ્રાણવાયુ, શીતળ છાંયો અને અમૂલ્ય કુદરતી સંસાધનો પૂરા પાડવામાં પૃથ્વીના ફેફસા સમાન ભૂમિકા ભજવે છે.

વન વિભાગ અને સ્થાનિક વહીવટી તંત્રની સહભાગીદારી

પર્યાવરણના આ ઉમદા કાર્યક્રમમાં આંતરરાષ્ટ્રીય પ્રતિનિધિઓની સાથે જામનગરના નાયબ વન સંરક્ષક (DFC) અરુણ કુમાર સહિત આર.ટી.ઓ. અને વન વિભાગના ઉચ્ચ અધિકારીઓ અને કર્મચારીઓ ઉત્સાહભેર સહભાગી થયા હતા. વેનેઝુએલાના રાષ્ટ્રપતિની આ મુલાકાત ભારત અને વેનેઝુએલા વચ્ચેના મૈત્રીપૂર્ણ સંબંધોને મજબૂત કરવાની સાથે જામનગર માટે પણ ગૌરવપૂર્ણ સાબિત થઈ છે.