ભારતીય વિજ્ઞાનીઓની અભૂતપૂર્વ સિધ્ધી : ટાઇફોઇડ વિરોધી રસી બનાવી

વિશ્વની પ્રથમ સંપૂર્ણ રસી સાલ્મોનેલા ટાઇફી અને પેરાટાઇફી-એ સામે રક્ષણ પૂરું પાડશે.
ટુંકસમયમાં મોટાપાયે ઉત્પાદન શરુ કરવામાં આવશે

ભારતીય તબીબોએ ટાઈફોઈડ સામેની પ્રથમ સંપૂર્ણ રસી વિકસાવીને મોટી સફળતા પ્રાપ્ત કરી છે. આ રસી બંને પ્રકારના રોગ, સાલ્મોનેલા ટાઇફી અને પેરાટાઇફી-એ સામે રક્ષણ પૂરું પાડશે. આ રસી તે દીપોલી ફાર્માસ્યુટિકલ્સ અને વૈજ્ઞાનિકોની ટીમ દ્વારા સંયુક્ત રીતે વિકસાવવામાં આવી હોવાનું જાહેર થયું છે.

ઇન્ડિયન કાઉન્સિલ ઓફ મેડિકલ રિસર્ચએ આ મહત્વપૂર્ણ સિદ્ધિની જાહેરાત કરી છે. ICMR અનુસાર, આ નવી રસી ટાઇફોઇડના ચેપને સંપૂર્ણપણે દૂર કરવામાં મદદ કરશે અને એન્ટિબાયોટિક્સની જરૂરિયાત પણ ઘટાડશે.

વૈજ્ઞાનિકોના મતે, આ પહેલી રસી હશે જે બંને પ્રકારના ટાઇફોઇડ સામે રક્ષણ આપશે. દર વર્ષે વિશ્વભરમાં લગભગ 10 લાખ લોકો ટાઇફોઇડથી પ્રભાવિત થાય છે, જેમાં મોટાભાગના કેસ ભારત અને અન્ય વિકાસશીલ દેશોમાં જોવા મળે છે. સંશોધકોએ જણાવ્યું હતું કે આ રસીનું પ્રારંભિક પરીક્ષણ ઉંદરો પર કરવામાં આવ્યું હતું, જેમાં સકારાત્મક પરિણામો જોવા મળ્યા હતા. હવે તેને મોટા પાયે પરીક્ષણ માટે તૈયાર કરવામાં આવી રહ્યું છે.

નિષ્ણાતો માને છે કે આ રસીના મોટા પાયે ઉપયોગથી ટાઇફોઇડના કેસોમાં 60% સુધીનો ઘટાડો થઈ શકે છે. આ ખાસ કરીને એવા વિસ્તારોમાં ફાયદાકારક રહેશે જ્યાં દૂષિત પાણી અને નબળી સ્વચ્છતાને કારણે રોગ વધુ ફેલાયેલો છે. ICMR અનુસાર, આ રસી સૌપ્રથમ ઉચ્ચ ચેપવાળા વિસ્તારોમાં ઉપલબ્ધ કરાવવામાં આવશે. તેનું મોટા પાયે ઉત્પાદન ટૂંક સમયમાં શરૂ કરવામાં આવશે, જેથી તેને સામાન્ય લોકો માટે ઉપલબ્ધ કરાવી શકાય. ભારતની આ વૈજ્ઞાનિક સિદ્ધિને વૈશ્વિક સ્વાસ્થ્ય તરફ એક મોટું પગલું માનવામાં આવી રહ્યું છે, જે ટાઇફોઇડથી થતા મૃત્યુ અને ચેપના દરને અસરકારક રીતે નિયંત્રિત કરશે.