આ રીતે ફસાવ્યો હતો અમિતને…રીબડાના અમિત ખૂંટ આત્મહત્યા કેસમાં યુવતીએ મોં ખોલતા બે એડવોકેટની ધરપકડ

રીબડાના વતની અમિત દામજીભાઈ ખૂંટના આપઘાત કેસમાં પોલીસ કસ્ટડીમાં રહેલી પૂજા રાજગોર નામની આરોપી યુવતીએ મોં ખોલતા ગોંડલ અને રાજકોટના બે એડવોકેટની સંડોવણી સાથે પૂર્વયોજિત કાવતરૂ હોવાનો ઘટસ્ફોટ થયો છે. ગોંડલ પોલીસે રાજકોટમાં રહેતા એડવોકેટ સંજય હેમતભાઈ પંડિત અને ગોંડલના એડવોકેટ કોંગ્રેસ કાર્યકર દિનેશ પાલાભાઈ પાતરની ધરપકડ કરી છે. હવે યુવતીને નાણાકીય, નોકરીની તથા લાઈફ બનાવી દેવાની લાલચ આપી સમગ્ર કાંડના સુત્રધાર સુધી પહોંચવા પોલીસે તપાસના ઘોડા દોડાવ્યા છે.

રીબડાનો વતની અને રાજકોટમાં રહેતા અમિત ખૂંટને સગીરા સાથે મોબાઈલમાં સંપર્ક થયો હતો. તેણીને ગત શુક્રવારે કારમાં લઈ જઈને અમિતે દૂષ્કર્મ ગુજાર્યાના આરોપસર અમિત સામે બીજા દિવસે ગત શનિવારે રાજકોટ એ-ડિવિઝન પોલીસ મથકમાં ફરિયાદ નોંધાઈ હતી. ફરિયાદના બે દિવસ બાદ અમિત ખૂંટે પોતાની વાડીએ રીબડા ગામે ફાંસો ખાઈ આત્મહત્યા કર્યાને બનાવ સોમવારે સવારે જાહેર થયો હતો. અમિતના ખીસ્સામાંથી સ્યુસાઈડ નોટ નીકળી હતી જેમાં તેને યુવતીએ ફસાવ્યો હતો. હનીટ્રેપ થઈ હતી અને બદનામીના કારણે પોતે આપઘાત કરી રહ્યાનું સમગ્ર પ્રકરણ પાછળ રીબડાના અનિરૂધ્ધસિંહ જાડેજા તથા રાજદીપનો હાથ હોવાના આક્ષેપો સ્યુસાઈડ નોટમાં થયા હતા. જે આધારે પોલીસે બે યુવતી, અનિરૂધ્ધસિંહ તથા તેના પુત્ર રાજદીપ વિરૂધ્ધ આપઘાતની ફરજ પાડવાના આરોપસર સોમવારે સાંજે ગુનો નોંધ્યો હતો.

રેન્જ IG અશોકુમાર યાદવ, SP હિંમકરસિંહ, DYSP સીમરન ભારદ્વાજ તથા અન્ય અધિકારીઓના માર્ગદર્શન હેઠળ રાજકોટ રૂરલ LCB, PI વી.વી. ઓડેદરા, ગોંડલ તાલુકા PI એ.સી. ડામોર તથા ટીમોએ તપાસ આરંભી હતી. બન્ને યુવતીને સકંજામાં લઈ ધરપકડ કરી પૂછતાછ કરાઈ હતી જેમાં આરોપી પૂજાએ આપેલી કેફિયતના આધારે બન્ને એડવોકેટ સંજય પંડિત તથા દિનેશ પાતરની ધરપકડ કરાઈ છે.

પૂજાએ વટાણા વેરી નાખ્યા

પૂજાએ પોલીસ સમક્ષ મોં ખોલી વટાણા વેરી નાખ્યા હતા જેમાં અમિત ખૂંટને ફસાવવા માટે પૂજાના ટચમાં રહેલા એક વ્યક્તિ પૂજાને મળ્યો હતો. તેણે અમિતને સોશિયલ મીડિયાના માધ્યમથી મિત્રતા કેળવી પ્રેમ સંબંધમાં લઈ શરીર સંબંધ બાંધી ખોટી બળાત્કારની ફરિયાદ કરવા કહ્યું હતું. બદલામાં લાઈફ બની જશે, સારામાં સારી જોબ મળશે. લાલચમાં આવેલી પૂજાએ અમિતને ફસાવવા જાળ ગોઠવી હતી.

સગીરાને તૈયાર કરીને અમિતને જાળમાં લીધો હતો !

પૂજાએ તેની સાથે પરિચયમાં રહેલી સગીરવયની અને મોડલિંગ કામ કરતી સગીરાને પણ નાણાંની જરૂરિયાત હોય અમિત સાથે સંપર્ક કરવા અને ફરિયાદ નોંધાવવા સુધી તૈયાર કરી હતી. સગીરાએ બનાવના દશેક દિવસ પૂર્વે અમિત સાથે સોશિયલ મીડિયા મારફત સંપર્ક સાધ્યો હતો. ફરિયાદ કરાવવા સંબંધે બન્ને એડવોકેટ પંડિત અને પાતર સાથે રહેશું તેવું પૂજાને કાવતરુ ગોઠવનાર શખસે કહ્યું હતું. પૂજા, સગીરાના મોબાઈલ ફોન કબજે લેવાયા છે. પૂજાને તૈયાર કરનાર મીડિયેટર હાથમાં આવ્યા બાદ એ મીડિયેટરને કોઈએ કામ સોંપ્યું હતું કે મીડિયેટરે જાતે જ સમગ્ર કાંડ ગોઠવ્યું હતું ? તે ખૂલશે તેવું કહીને પોલીસ અધિકારીએ હાલના તબક્કે મીડિયેટરના નામે મગનું નામ મરી પાડ્યું ન હતું. ફરિયાદમાં આરોપ છે એ મુજબ પિતા-પુત્ર અનિરૂધ્ધસિંહ, રાજદીપ મીડિયેટર સાથે સંપર્કમાં હતા કે તેઓએ કામ સોંપ્યું હતું ? એ બાબતે પણ પોલીસ અધિકારીએ કહ્યું કે હાલ તો આવું કાંઈ સ્પષ્ટ થયું નથી. મીડિયેટર સકંજામાં આવી ગયો હોવાનું જાણવા મળે છે. બન્ને યુવતીને નાણાં ચૂકવાય એ પૂર્વે જ ઘટસ્ફોટ થતાં હાલ તો જેલની હવા ખાવાનો વખત આવ્યો.