આજે ગ્રામ પંચાયતોનું ચૂંટણી ચિત્ર થશે સ્પષ્ટ : સરપંચ બનવા માટે 249 ઉમેદવારો મેદાને

રાજ્યમાં આગામી તા.22 જૂનના રોજ યોજાનાર ગ્રામ પંચાયતોની સામાન્ય, પેટા અને મધ્યસત્રીય ચૂંટણી અંતર્ગત રાજકોટ જિલ્લાની 64 ગ્રામ પંચાયતની સામાન્ય અને 243 ગ્રામ પંચાયતની પેટા ચૂંટણી યોજાનાર છે ત્યારે ઉમેદવારીપત્ર ભરવાના અંતિમ દિવસે રાજકોટ જિલ્લામાં સરપંચ પદ માટે 249 અને સભ્યપદ માટે 1037 ઉમેદવારોએ ઉમેદવારી નોંધાવી હોવાના સત્તાવાર આંકડા સામે આવ્યા છે. બીજી તરફ આજે ઉમેદવારીપત્ર ભરવાનો અંતિમ દિવસ હોય બપોર સુધીમાં ચૂંટણી ચિત્ર સ્પષ્ટ બનશે.

આ પણ વાંચો : રાજકોટની કટારિયા ચોકડીએ બ્રિજના સર્વિસ રોડ માટે નડતરરૂપ 25 મકાનનું ડિમોલિશન

ગ્રામ પંચાયતની સામાન્ય ચૂંટણી અંતર્ગત તા.2જી જૂને જાહેરનામું પ્રસિદ્ધ થતા જ ઉમેદવારીપત્ર ભરવાનું શરૂ થયું હતું જેમાં તા.9 જૂનના રોજ ઉમેદવારીપત્ર ભરવાના અંતિમ દિવસ સુધીમાં રાજકોટ જિલ્લાની 64 ગ્રામ પંચાયતની સામાન્ય અને 243 ગ્રામ પંચાયતની પેટા ચૂંટણી અન્વયે સરપંચ પદ માટે 249 ઉમેદવારો અને સભ્યપદ માટે 1037 ઉમેદવારોએ નામાંકન કર્યું હતું.જેમાં મંગળવારે ઉમેદવારી પત્રની ચકાસણી પૂર્ણ થતા આજે ઉમેદવારીપત્ર ભરવાની અંતિમ તારીખ હોય આજે બપોર સુધીમાં ગામડાની સંસદ એટલે કે, ગ્રામ પંચાયતની ચૂંટણીનું ચિત્ર સ્પષ્ટ થશે. જે બાદ 11 દિવસના ચૂંટણી પ્રચારના અંતે 22મીએ મતદાન પ્રક્રિયા હાથ ધરવામાં આવશે.