બંગાળની ખાડીમાં સંકટના વાદળો: ડિપ્રેશન બન્યું વધુ શક્તિશાળી, આંધ્ર પ્રદેશ અને ઓડિશામાં ભારે વરસાદનું એલર્ટ

ચોમાસાની વિદાય ટાણે બંગાળની ખાડીમાં હવામાનમાં ભારે ઉથલપાથલ જોવા મળી રહી છે. અહીં સર્જાયેલું એક શક્તિશાળી ડીપ્રેશન હવે વધુ ગંભીર સ્વરૂપ ધારણ કરી રહ્યું છે, જેના કારણે હવામાન વિભાગ દ્વારા પૂર્વ ભારતના તટીય રાજ્યોમાં હાઈ એલર્ટ જાહેર કરવામાં આવ્યું છે. આ સિસ્ટમની સીધી અસર આંધ્ર પ્રદેશ અને ઓડિશાના દરિયાકાંઠાના વિસ્તારો પર વર્તાઈ રહી છે, જ્યાં આગામી દિવસોમાં ભારેથી અતિ ભારે વરસાદ પડવાની પૂરી શક્યતા છે.

ઓડિશાના 7 જિલ્લાઓમાં રેડ એલર્ટ અને શાળાઓ બંધ

બંગાળની ખાડીમાં સક્રિય થયેલી આ હવામાનકીય સિસ્ટમના કારણે ઓડિશા સરકાર સંપૂર્ણપણે સાવચેત થઈ ગઈ છે. સંભવિત ખતરાને ધ્યાનમાં રાખીને રાજ્યના 7 જેટલા પ્રભાવિત જિલ્લાઓમાં શાળાઓ તાત્કાલિક અસરથી બંધ રાખવામાં આવી છે. આ ઉપરાંત, કોઈ પણ આકસ્મિક સ્થિતિને પહોંચી વળવા માટે સરકારી અધિકારીઓ અને કર્મચારીઓની રજાઓ રદ કરી દેવામાં આવી છે તથા દરિયાકાંઠાના વિસ્તારોમાં રાહત અને બચાવ ટીમોને તૈનાત કરી દેવામાં આવી છે.

આ પણ વાંચો: રાજકોટ રેન્જમાં સપાટો: ડી-સ્ટાફના કર્મચારીઓની કુંડળી મંગાવાતા પોલીસ બેડામાં ભારે ફફડાટ

તટ પાર કરવાની સંભાવના અને પવનની ગતિ

હવામાન વિભાગ (IMD) ની લેટેસ્ટ અપડેટ મુજબ, આ ડીપ્રેશન પશ્ચિમ-ઉત્તર પશ્ચિમ દિશા તરફ આગળ વધી રહ્યું છે.

હવામાન વિભાગના જણાવ્યા અનુસાર, દક્ષિણ ઓડિશાના કોરાપુટ, ગજપતિ અને ગંજમ જિલ્લાઓમાં 23 અને 24 સપ્ટેમ્બર માટે ‘રેડ એલર્ટ’ જારી કરવામાં આવ્યું છે, જ્યારે કાલાહાંડી, નબરંગપુર અને મલકાનગીરીમાં પણ ભારે વરસાદની ચેતવણી આપવામાં આવી છે. આંધ્ર પ્રદેશના તટીય વિસ્તારોમાં પણ વહીવટી તંત્ર દ્વારા વિશેષ કંટ્રોલ રૂમ શરૂ કરવામાં આવ્યા છે.

હવામાન વિભાગ દ્વારા દરિયાકાંઠાના માછીમારોને આગામી કેટલાક દિવસો સુધી દરિયો ન ખેડવાની કડક સૂચના આપવામાં આવી છે. તંત્ર દ્વારા સતત મોનિટરિંગ કરવામાં આવી રહ્યું છે જેથી કોઈપણ પ્રકારની આપત્તિના સમયે તાત્કાલિક પગલાં ભરી શકાય.