અમદાવાદમાં રિક્ષા ગેંગ સક્રિય: મુસાફરોને નિશાન બનાવી ચોરી અને લૂંટના બનાવ વધ્યા

અમદાવાદ શહેરના વ્યસ્ત રાજમાર્ગો પર હવે જાહેર પરિવહનની મુસાફરી જોખમી બની રહી છે. વાહનની પ્રતીક્ષા કરતા નિર્દોષ નાગરિકોને રિક્ષામાં બેસાડી નજર ચૂકવી ચોરી કરવા અથવા નિર્જન સ્થળે લઈ જઈ ધમકાવી લૂંટી લેતી ટોળકીઓ શહેરમાં ફરી સક્રિય થઈ છે. સામાન્ય નાગરિકથી લઈને સુરક્ષા દળના જવાનો પણ આવી શાતિર ગેંગની જાળમાં ફસાઈ રહ્યા છે. તાજેતરમાં શહેરના શાહીબાગ અને રામોલ વિસ્તારમાં બનેલી બે જુદી-જુદી ઘટનાઓએ મુસાફરોની સલામતી સામે ગંભીર સવાલો ઊભા કર્યા છે, જેમાં પોલીસે સત્તાવાર ગુના નોંધી વધુ તપાસ હાથ ધરી છે.

શાહીબાગ: પરીક્ષા આપી પરત ફરી રહેલા એસઆરપી જવાન બન્યા ભોગ

ભરૂચ જિલ્લા જેલ ખાતે ફરજ બજાવતા અને રાજ્ય અનામત દળ (SRP) જૂથ-10 વાલિયા સાથે સંકળાયેલા 52 વર્ષીય આર્મ્ડ પોલીસ કોન્સ્ટેબલ કાનજી આહીર ગાંધીનગરમાં હિન્દી વિષયની પરીક્ષા આપવા આવ્યા હતા. પરીક્ષા પતાવી તેઓ શાહીબાગ ઘોડા કેમ્પ ખાતે ભોજન લઈ કાલુપુર જવા માટે વાહનની રાહ જોઈ રહ્યા હતા. આ દરમિયાન એક રિક્ષામાં તેઓ સવાર થયા, જેમાં આગળ ચાલક અને પાછળ પહેલેથી ત્રણ પેસેન્જરો બેઠા હતા.

ચાલુ રિક્ષામાં ધ્યાન ભટકાવી ગળામાંથી સોનાની ચેઇન સેરવી લીધી

રિક્ષા જ્યારે સિવિલ હોસ્પિટલ રોડ પર આગળ વધી રહી હતી ત્યારે બાજુમાં બેઠેલા મુસાફરોએ જાણીજોઈને અડચણ ઊભી કરવાનું શરૂ કર્યું હતું. એક પેસેન્જરે સરખી રીતે બેસાતું નથી તેવો ડોળ કરીને કાનજીભાઈના ખભા અને ખિસ્સા પર હાથ મૂકી તેમનું ધ્યાન ભટકાવ્યું હતું. થોડે દૂર સિવિલ સામે આવેલા ઇન્ડિયન ઓઇલ પેટ્રોલ પંપ પાસે પહોંચતા જ ચાલકે તેમને ઉતારી દીધા હતા. રિક્ષા ગયા બાદ તપાસ કરતાં કાનજીભાઈના ગળામાંથી આશરે 1 તોલાની સોનાની ચેઇન (કિંમત ₹1,00,000) ગાયબ જણાઈ હતી. નોકરી પર હાજર થવાનું હોવાથી તેઓ તે સમયે રવાના થયા હતા, પરંતુ બાદમાં રજા મેળવી શાહીબાગ પોલીસ મથકે ચોરીની ફરિયાદ નોંધાવી હતી.

રામોલ: ડ્રાઇવર આધેડને રિક્ષામાં બેસાડી રોકડ અને દસ્તાવેજોની લૂંટ

બીજી એક ઘટનામાં વસ્ત્રાલ રામોલ વિસ્તારમાં રહેતા અને ડ્રાઇવિંગ કરતા 52 વર્ષીય પહાડસિંગ રાઠોડ ઘરે જવા માટે રામોલ રિંગ રોડ ટોલટેક્સ પાસે ઊભા હતા. પાંજરાપોળ ચાર રસ્તા જવા માટે ₹10 ભાડું નક્કી કરી ચાલકે તેમને આગળની સીટ પર બેસાડ્યા હતા, જ્યારે પાછળ એક અજાણ્યો મુસાફર બેઠો હતો. રિક્ષા થોડે આગળ જતાં જ બંને શખ્સોએ અસલ રૂપ બતાવી ધાકધમકી આપવાનું શરૂ કર્યું હતું.

આ પણ વાંચો: ક્યુબા સામે સંભવિત લશ્કરી કાર્યવાહીની તૈયારીમાં અમેરિકા: યુએસ આર્મી રિઝર્વે 4 મહિનામાં સૈનિકો અને મેડિકલ બ્રિગેડની તૈનાતીનું મૂલ્યાંકન શરૂ કર્યું

પ્રતિકાર છતાં હાથ પકડી ખિસ્સામાંથી પર્સ ઝૂંટવી લીધું

ભોગ બનનાર પાસે કશું ન હોવાનું કહેવા છતાં પાછળ બેઠેલા શખ્સે તેમના બંને હાથ પકડી રાખ્યા હતા અને ચાલકે ખિસ્સામાંથી ₹10,800 ની રોકડ રકમ તેમજ મહત્ત્વના અસલ દસ્તાવેજો ભરેલું પર્સ લૂંટી લીધું હતું. ત્યારબાદ પુરોહિત હોટેલ પહેલાં તેમને રસ્તા પર ઉતારી આરોપીઓ ફરાર થઈ ગયા હતા. પરિવારમાં મરણ પ્રસંગ હોવાથી તેઓ તુરંત ફરિયાદ કરી શક્યા નહોતા, પરંતુ બાદમાં પોલીસ દ્વારા પેસેન્જર લૂંટતી ગેંગ ઝડપાઈ હોવાની જાણ થતાં તેમણે રામોલ પોલીસ સ્ટેશન પહોંચી ફરિયાદ નોંધાવી હતી.

ગુના અને ભોગ બનેલા મુસાફરોની વિગતો

અમદાવાદ શહેરમાં અજાણી રિક્ષાઓમાં મુસાફરી કરવી હવે સલામત રહી નથી તે આ બંને કિસ્સાઓ પરથી સ્પષ્ટ થાય છે. અગાઉથી ગોઠવાયેલા સાગરિતો મુસાફરનું ધ્યાન ભટકાવીને કે ડરાવી-ધમકાવીને કિંમતી ચીજવસ્તુઓ પડાવી લેવાની મોડસ ઓપરેન્ડી અપનાવી રહ્યા છે. રામોલ પોલીસે બે આરોપીઓને ઝડપી લઈને આ દિશામાં કામગીરી આગળ ધપાવી છે, જ્યારે શાહીબાગ પોલીસે પણ ચોરીનો ગુનો નોંધી ગેંગના સભ્યોને ઝડપી પાડવા ચક્રો ગતિમાન કર્યા છે. મુસાફરો પણ એકલ-દોકલ વાહનોમાં બેસતી વખતે પૂરતી તકેદારી રાખે તે જરૂરી બન્યું છે.