ગુજરાતમાં સેમિકન્ડક્ટર ડિઝાઇન ક્ષેત્રે ક્રાંતિ: ChipIN એક્સ્ટેન્શન સેન્ટર અને VLSI સેન્ટર ઑફ એક્સેલન્સની ભેટ

ગુજરાત સરકાર,GTU અને C-DAC બેંગલુરુ વચ્ચે સહયોગથી ગુજરાતમાં સેમિકન્ડક્ટર ડિઝાઇન ક્ષમતાઓને મળશે નવી દિશા

ભારતના ઝડપથી વિકસતા સેમિકન્ડક્ટર ક્ષેત્રમાં ગુજરાતનું અગ્રણી સ્થાન વધુ મજબૂત બને તે દિશામાં મુખ્યમંત્રી  ભૂપેન્દ્ર પટેલના દૂરંદેશી માર્ગદર્શનમાં તથા વિજ્ઞાન અને ટેક્નોલોજી મંત્રી  અર્જુન મોઢવાડિયાના નેતૃત્વમાં ગુજરાત સરકારના વિજ્ઞાન અને ટેક્નોલોજી વિભાગ અંતર્ગત ગુજરાત સ્ટેટ ઇલેક્ટ્રોનિક્સ મિશન (GSEM) દ્વારા ગુજરાત ટેક્નોલોજિકલ યુનિવર્સિટી (GTU) અને સેન્ટર ફોર ડેવલપમેન્ટ ઑફ એડવાન્સ્ડ કમ્પ્યુટિંગ (C-DAC), બેંગલુરુના સહયોગથી આજે પ્રસ્તાવિત ChipIN એક્સ્ટેન્શન સેન્ટર તથા VLSI ડિઝાઇન માટેના સેન્ટર ઑફ એક્સેલન્સ (CoE) માટે ઓરિએન્ટેશન કાર્યક્રમ અને કિક-ઓફ બેઠકનું આયોજન કરવામાં આવ્યું હતું.

કાર્યક્રમના ઉદ્ઘાટન સત્રમાં વિજ્ઞાન અને ટેકનોલોજી વિભાગના સચિવ  મતી પી. ભારતી મુખ્ય અતિથિ તરીકે ઉપસ્થિત રહ્યાં હતાં. મતી નેહા કુમારી, IAS, મિશન ડિરેક્ટર, GSEM સહિત પ્રતિષ્ઠિત શિક્ષણવિદો, સંશોધકો, ઉદ્યોગ અગ્રણીઓ અને વિવિધ સંસ્થાઓના પ્રતિનિધિઓ ઉપસ્થિત રહ્યાં હતાં.

C-DAC બેંગલુરુના નિષ્ણાતોએ રાષ્ટ્રીય ChipIN પહેલ તથા તેના માધ્યમથી ઉપલબ્ધ અદ્યતન સેમિકન્ડક્ટર ડિઝાઇન સુવિધાઓ અંગે માહિતી આપી હતી. આ સુવિધાઓમાં Electronic Design Automation (EDA) ટૂલ્સ, High Performance Computing (HPC) સંસાધનો, સેમિકન્ડક્ટર IPs અને Tape-out Support જેવી અદ્યતન સુવિધાઓનો સમાવેશ થાય છે.

આ ઓરિએન્ટેશન કાર્યક્રમમાં ગુજરાતની 30થી વધુ શૈક્ષણિક સંસ્થાઓએ ભાગ લીધો હતો. સંસ્થાઓને સેમિકન્ડક્ટર સંશોધન, ચિપ ડિઝાઇન, નવીનતા, પ્રોડક્ટ ડેવલપમેન્ટ અને કુશળ માનવબળના વિકાસ માટે ChipIN પ્લેટફોર્મનો લાભ લેવા અંગે માર્ગદર્શન આપવામાં આવ્યું હતું.

આ પણ વાંચો: 4 વર્ષમાં 14,925 દર્દીઓને રૂ. 14 કરોડથી વધુની સહાય

ગુજરાતને સેમિકન્ડક્ટર ડિઝાઇનનું અગ્રણી હબ બનાવવાની દિશામાં મહત્વપૂર્ણ પહેલ

પ્રસ્તાવિત ChipIN એક્સ્ટેન્શન સેન્ટર અને VLSI માટેનું CoE ગુજરાતમાં અદ્યતન સેમિકન્ડક્ટર ડિઝાઇન ક્ષમતાઓ વિકસાવવા માટે મહત્વપૂર્ણ માળખાકીય પહેલ બનશે. આ સેન્ટર દ્વારા શૈક્ષણિક સંસ્થાઓ, સ્ટાર્ટઅપ્સ, MSMEs, સંશોધન સંસ્થાઓ અને ઉદ્યોગો વચ્ચે સહયોગને પ્રોત્સાહન આપવામાં આવશે.

આ પહેલથી સંશોધનને પ્રોડક્ટ ડેવલપમેન્ટ અને વ્યાવસાયિકીકરણ સાથે જોડવામાં મદદ મળશે તથા AI Accelerators, Automotive Electronics, RISC-V Processors, Embedded Systems અને IoT જેવા ઉભરતા ક્ષેત્રોમાં નવીનતા અને ચિપ ડિઝાઇનને પ્રોત્સાહન મળશે.

ગુજરાતમાં સેમિકન્ડક્ટર મેન્યુફેક્ચરિંગ ક્ષેત્રે થઈ રહેલા ઝડપી વિકાસને ધ્યાનમાં રાખીને, ડિઝાઇન ક્ષમતાઓ અને કુશળ માનવબળનું નિર્માણ રાજ્યના સેમિકન્ડક્ટર ઇકોસિસ્ટમને વધુ મજબૂત બનાવશે.

GSEMની મહત્વપૂર્ણ ભૂમિકા

ગુજરાતના ઇલેક્ટ્રોનિક્સ અને સેમિકન્ડક્ટર ઇકોસિસ્ટમના વિકાસ માટેની નોડલ એજન્સી તરીકે GSEM આ પહેલના અમલીકરણમાં મહત્વપૂર્ણ ભૂમિકા ભજવી રહ્યું છે. GSEM દ્વારા શૈક્ષણિક સંસ્થાઓનું ઓનબોર્ડિંગ, હિતધારકો સાથે સંકલન, ઇકોસિસ્ટમ ડેવલપમેન્ટ અને ઉદ્યોગ-શૈક્ષણિક સહયોગને સુદૃઢ બનાવવા માટે જરૂરી સહયોગ પૂરો પાડવામાં આવી રહ્યો છે.

આ પહેલ ગુજરાતને સેમિકન્ડક્ટર ડિઝાઇન, નવીનતા, સંશોધન અને પ્રતિભા વિકાસના અગ્રણી હબ તરીકે સ્થાપિત કરવાની દિશામાં મહત્વપૂર્ણ પગલું છે. સાથે સાથે, તે ગુજરાતના વિકસતા મેન્યુફેક્ચરિંગ ઇકોસિસ્ટમને પૂરક બનશે અને ભારતને વૈશ્વિક સેમિકન્ડક્ટર ક્ષેત્રમાં અગ્રણી સ્થાન અપાવવાના રાષ્ટ્રીય લક્ષ્યને વેગ આપશે.

બે દિવસીય કાર્યક્રમ દરમિયાન સેમિકન્ડક્ટર ડિઝાઇન ઇન્ફ્રાસ્ટ્રક્ચર, HPC, સ્વદેશી પ્રોસેસર ઇકોસિસ્ટમ, IoT સોલ્યુશન્સ અને ચિપ ડેવલપમેન્ટ અંગે વિવિધ તકનીકી સત્રો યોજાશે.

આ પહેલ દ્વારા ગુજરાતમાં “Design to Innovation” અને “Research to Product” તરફની યાત્રાને વેગ મળશે તથા રાજ્યમાં સેમિકન્ડક્ટર ક્ષેત્ર માટે ભવિષ્યલક્ષી અને કુશળ માનવબળ તૈયાર કરવામાં મહત્વપૂર્ણ યોગદાન મળશે.

આ કાર્યક્રમમાં IIT ગાંધીનગરના ડિરેક્ટર ડૉ. રજત મૂના, SETS ચેન્નાઈના એક્ઝિક્યુટિવ ડિરેક્ટર ડૉ. એન. સુબ્રમણિયન, GTUના ઇન્ચાર્જ વાઇસ ચાન્સેલર ડૉ. વૈભવ ભટ્ટ, GTUના પૂર્વ વાઇસ ચાન્સેલર ડૉ. રાજુલ કે. ગજ્જર, C-DAC બેંગલુરુના  સેન્ટિલ કુમાર આર., GTUના રજિસ્ટ્રાર ડૉ. કે. એન. ખેર, GSETના ડિરેક્ટર ડૉ. માધુરી ભાવસાર અને CoE-AIના એડવાઇઝર ડૉ. આર. એ. ઠક્કર સહિતના મહાનુભાવો ઉપસ્થિત રહ્યા હતાં.