રાજકોટનો સાંઢિયા પુલ તૈયાર થતાં હજુ દોઢ મહિનો લાગશે: બ્રિજનું નામ બદલાવાનું નિશ્ચિત, જાણો શું છે તેની વિશેષતા

રાજકોટના જામનગર રોડ ઉપર આવેલો ઐતિહાસિક સાંઢિયા બ્રિજને તોડી તેના સ્થાને નવો ફોર-લેન બ્રિજ બનાવવાનું કામ સવા વર્ષથી ચાલી રહ્યું છે ત્યારે હવે તેની કામગીરી અંતિમ તબક્કામાં પહોંચી ગઈ છે આમ છતાં નવો બ્રિજ તૈયાર થવામાં દોઢ મહિનાનો લાગી જાય તેવી શક્યતા ઈજનેરી સૂત્રોએ વ્યક્ત કરી હતી. આ બ્રિજ નીચેથી રેલવે ટ્રેક પસાર થઈ રહ્યો હોવાને કારણે ટ્રેક ઉપર કામ શરૂ કરતાં પહેલાં રેલવેની મંજૂરી લેવી જરૂરી હોવાથી ઘણા લાંબા સમય બાદ આ મંજૂરી મળતાં જ મહાપાલિકાએ ટ્રેક ઉપરનો ભાગ કે જ્યાં બ્રિજ બનાવવો છે ત્યાં તાત્કાલિક સ્ટીલના સાત ગર્ડર મૂકી દીધા હતા. દાવા પ્રમાણે બ્રિજનું કામ 90% પૂર્ણ થઈ ગયું છે.

ઈજનેરી સૂત્રોએ જણાવ્યું કે રેલવે દ્વારા રાત્રે 3:30થી સવારે 6:20 વાગ્યા સુધીનો બ્લોક મતલબ કે ત્યારે ટ્રેન પસાર થઈ રહી ન હોવાથી બ્રિજનું કામ કરવા માટે મંજૂરી આપતાં જ બુધવારે રાત્રે સાત ગર્ડર મૂકી દેવામાં આવ્યા હતા. હવે કોસ ગર્ડર મૂકવાનું કામ શરૂ કરવામાં આવશે. આ પ્રમાણે કુલ 36 કોસ ગર્ડર મૂકવાના છે તેમાંથી 12 ગર્ડર રેલવેના પાટા પર હોવાથી તેને પહેલાં ફિટ કરી દેવાશે.

જો 10 એપ્રિલે બ્રિજનું કામ પૂર્ણ થશે તો ત્યારે શાસકો આ બ્રિજનું લોકાર્પણ કરી શકશે નહીં કેમ કે શાસકોની 11 માર્ચ સાંજે 6 વાગ્યે ટર્મ પૂરી થઈ રહી હોવાથી તેઓ પૂર્વ કોર્પોરેટર બની જશે ત્યારે વહીવટદાર શાસન મુકનાર હોવાથી તેમના હસ્તે બ્રિજ ખુલ્લો મુકાય તેવી શક્યતા પણ નકારી શકાતી નથી. જો 11 માર્ચ પહેલાં જ કામ પૂર્ણ થાય તો શાસકોને લોકાર્પણ કરવાની તક મળે તેમ હોવાથી બ્રિજ 11 માર્ચ સુધીમાં તૈયાર કરાવી લેવા પણ દોડધામ કરવામાં આવે તો નવાઈ પામવા જેવું નથી.

બ્રિજનું નામ બદલાવાનું નિશ્ચિત

સાંઢિયા બ્રિજ તૈયાર થઈ ગયા બાદ તેનું નામ બદલાવવામાં આવે તેવી શક્યતા પણ નકારી શકાતી નથી. આ બ્રિજ અડધી સદીથી કાર્યરત હતો. જો કે તેનો આકાર સાંઢિયા મતલબ કે ઊંટની પીઠ જેવો હોવાથી તેને સાંઢિયા બ્રિજ નામ આપવામાં આવ્યું હતું. એ સમયે બ્રિજ ટુ-લેન હતો પરંતુ હવે તેને તોડીને ફોર-લેન કરવામાં આવ્યો છે ત્યારે નવા બ્રિજને નવું નામ પણ અપાઈ શકે છે.

આ પણ વાંચો:ભારત-પાક. બોર્ડર પર દ્રૌપદી મુર્મૂએ રચ્યો ઈતિહાસ: ફાઇટર હેલિકોપ્ટર ‘પ્રચંડ’માં ઉડાન ભરનારાં પહેલાં રાષ્ટ્રપતિ બન્યા, જુઓ તસવીરો

સાંઢિયા બ્રિજની વિશેષતા

• 602 મીટર (પોણો કિલોમીટર) ની લંબાઈ
• બ્રિજની પહોળાઈ 50 ફૂટ
• 21 ફૂટના સર્વિસ રોડ
• વાહન ઉપરાંત પગપાળા ચાલી શકાય તે માટે ફૂટપાથની વ્યવસ્થા
• વરસાદી પાણીના નિકાલ માટે બે બોક્સ કલ્વર્ટ