- પાંચ વર્ષ પૂર્વે થયેલા ઝગડાનો ખાર રાખી હુમલો કર્યો : માલવિયા પોલીસે ગુનો નોંધી ધરપકડ કરી
વોઇસ ઓફ ડે રાજકોટ
શહેરમાં એસટી વર્કશોપ પાછળ આંબેડકરનગરમાં રહેતા યુવાનને તેના પાડોશમાં રહેતા શખસે પાંચ વર્ષ પૂર્વે થયેલા ઝગડાનો ખાર રાખી તેને મારી નાખવાના ઇરાદે ગળા પર અને હાથ પર છરીના ઘા ઝીંકયા હતા. જેથી ગંભીર રીતે ઘવાયેલા યુવાને સારવાર માટે હોસ્પિટલ ખસેડવામાં આવ્યો હતો. અને આ મામલે માલવીયાનગર પોલીસે હત્યાની પ્રયાસની કલમ હેઠળ ગુનો નોંધી આરોપીની અટકાયત કરી છે.
વિગત મુજબ હાલ લોધિકાના પાળ ગામે સમાપીરના મંદિરવાળી શેરીમાં રહેતા મૂળ રાજકોટમાં ગોંડલ રોડ પર એસટી વર્કશોપ પાછળ આંબેડકરનગર શેરી નંબર ૧૪ના રહેવાસી અને ડ્રાઇવિંગ કામ કરનાર સંદીપ રામજીભાઈ રાઠોડ (ઉ.વ ૩૧) નોંધાવેલી ફરિયાદમાં આરોપીમાં પાર્થ ચતુરભાઈ ગોહેલ(ઉ.વ ૩૧ રહે. આંબેડકર નગર શેરી નંબર ૧૪)નું નામ આપતા જણાવ્યું હતું કે, પાંચ વર્ષ પૂર્વે આરોપી પાર્થ ચતુર ગોહેલ જે આંબેડકરનગર શેરી નંબર ૧૪ માં તેમની પાડોશમાં જ રહેતો હોય તેણે ઝઘડો કર્યો હતો. વધુ ઝઘડો ન થાય તે માટે જે તે સમયે યુવાન અહીંથી મકાન ખાલી કરી લોધિકાના પાળ ગામે જતો રહ્યો હતો.
દરમિયાન મંગળવાર બપોરના યુવાન અહીં આંબેડકરનગર શેરી નંબર ૧૫માં મોમાઈ પાનની દુકાને આવતા પાર્થ ગોહેલ તેને જોઈ જતા ઉશ્કેરાઈ ગયો હતો અને મારી નાખવાની ધમકી આપી છરી કાઢી યુવાનના ગળાના ભાગે અને હાથમાં ઝીંકી દીધી હતી. જેથી તેને લોહીલુહાણ હાલતમાં સારવાર માટે ખસેડાયો હતો.અને આ મામલે માલવિયા પોલીસના પી.આઇ જે.આર.દેસાઇએ ગુનો નોંધી આરોપીની ધરપકડ કરી છે.
