હવે દારુની પરમીટ ધરાવનારા પ્રવાસીઓની સમસ્યા હલ : કોઈ પણ લીકર શોપમાંથી દારુ ખરીદી શકાશે,ઓનલાઈન મળી જશે પરમીટ
ગુજરાતમાં દારૂબંધી હોવાથી બીજા રાજ્યોમાંથી અહી આવતા પ્રવાસીઓને દારુની જરૂર પડે તો સરકારી સમસ્યાનો સામનો કરવો પડી રહ્યો છે પરંતુ હવે ટૂંક સમયમાં આ સમસ્યાનો હલ આવી જવાનો છે. આવા પ્રવાસીઓએ ગુજરાતમાં આવીને એક પરમીટ કઢાવવાની હોય છે પરંતુ હવે આ કાર્યવાહી ઓનલાઈન થશે.આગામી પંદરેક દિવસમાં આ એપ કાર્યરત પણ થઇ જશે તેવું સરકારી સુત્રોએ જણાવ્યું છે.
આ સુત્રોના જણાવ્યા અનુસાર, આ એપ આવ્યા બાદ હોટેલના કાઉન્ટરો પર ડોક્યુમેન્ટ્સ લઈને ઊભું રહેવું પડશે નહીં. એપમાં આધારકાર્ડ જેવા ઈડેન્ટિટી પ્રુફ અપલૉડ કરવાની તેમ જ પેમેન્ટ કરવાની સુવિધા હશે. એકવાર તેમની એપ્લીકેશન વેરિફાઈડ થશે ત્યારબાદ પર્યટકને પરમિટ મળી જશે અને તે કોઈપણ ઓથોરાઈઝ્ડ શૉપ પરથી પરમિશન લીધેલી ક્વોન્ટિટીનો દારૂ લઈ શકશે.
હાલમાં બહારગામથી આવતા અને દારૂ પીવા ઈચ્છતા લોકોએ પસંદગીની હોટલમાંથી દારૂ લેવા માટે ફોર્મ ભરવું પડે છે, ડોક્યુમેન્ટ્ની હાર્ડકૉપી આપવી પડે છે, ત્યારબાદ હોટેલ મેનેજમેન્ટે આ ફોર્મ સબમિટ કરવું પડે છે અને સરકારી મંજૂરી મળ્યા બાદ પરમિટ આપવાની રહે છે. આ પ્રક્રિયા ઘણો સમય માગી લ્યે છે.
રાજ્યમાં આવતા ઘણા પર્યટકોએ ફરિયાદ કર્યા બાદ આ એપ વિકસાવવામાં આવે છે. ગુજરાત ટૂરિસ્ટ ડેસ્ટિનેશન બન્યું છે ત્યારે આ પ્રકારની સુવિધાઓ ઈઝ ઓફ ડુઈંગ બિઝનેસ માટે પણ લાભદાયી સાબિત થશે, તેવું એક અધિકારીએ જણાવ્યું હતું.
