એક વર્ષ સુધી પ્રોજેક્ટને હાથ પર ન લેવા નિર્ણય: માત્ર લોકોને સ્પર્શતા પ્રોજેક્ટમાં જ ખર્ચ કરાશે
મહાપાલિકામાં નવા શાસકોએ ચાર્જ સંભાળતાની સાથે જ એક બાદ એક કરકસરના પગલાં લેવાનું શરૂ કરી દીધું છે ત્યારે મોટા-મોટા પ્રોજેક્ટ કે જેની પાછળ કરોડો રૂપિયાનો ખર્ચ થવાનો છે અને મંજૂરી આપી દેવામાં આવી છે તેવા પ્રોજેક્ટને હાલ પૂરતી બ્રેક લગાવી દેવામાં આવી છે. ક્નવેન્શન સેન્ટર માટે ક્નસલ્ટન્ટની નિમણૂક, વર્કિંગ વિમેન હોસ્ટેલનું નિર્માણ, નવી જ્યુબિલી શાક માર્કેટ, પેડક રોડને ગૌરવપથ બનાવવાનું કામ પડતું મુક્યા બાદ હવે શાસકો દ્વારા છ વોર્ડના લોકોને સેન્ટ્રલ, ઈસ્ટ કે વેસ્ટ ઝોન કચેરી સુધી લાંબું ન થવું પડે તે માટે બનાવવામાં આવી રહેલી સાઉથ ઝોનની ઓફિસનું કામ પણ હોલ્ટ પર મુકવા નિર્ણય લેવામાં આવ્યો હોવાનું જાણવા મળ્યું છે.
આ પણ વાંચો: મહાશક્તિઓના મહાકુંભ; G7 સમિટમાં મોદી -ટ્રમ્પ વચ્ચે મુલાકાત
આ ઉપરાંત પૂર્વ શાસકોએ જાહેર કરેલા ૨૦૨૬-૨૭ના મહાપાલિકાના બજેટમાં સમાવિષ્ટ કરણપરામાં પ્રભાદેવી લાયબ્રેરીના સંકુલમાં સેન્ટ્રલ ઝોનની પેટા કચેરીના નિર્માણને પણ બ્રેક મારવાનું નક્કી કર્યું છે. એકંદરે આ બન્ને પ્રોજેક્ટ હવે એક વર્ષ સુધી હાથ પર ન લેવાય તેવી શક્યતા છે. શાસકો દ્વારા અત્યારે માત્રને માત્ર લોકોને સ્પર્શતા હોય તેવા પ્રોજેક્ટને જ પ્રાયોરિટી આપી તેના પાછળ ખર્ચ કરવાનો નિર્ણય લેવાયો છે ત્યારે ટૂંક સમયમાં જ પાંચેય પદાધિકારીઓ મ્યુનિસિપલ કમિશનર સાથે બેઠક કરીને કયા પ્રોજેક્ટ ચાલુ રાખવા અને કયા પ્રોજેક્ટને બ્રેક મારવી તેને લઈને નિર્ણય લેશે.
