મોરબી: રફાળેશ્વર GIDCના ગોડાઉનમાં 1.5 લાખ બોરી મગફળી ભસ્મ, ફાયર બ્રિગેડે મેજર કોલ કર્યો
મોરબીના રફાળેશ્વર GIDCમાં આજે સવારે મગફળીના વિશાળ ગોડાઉનમાં ભીષણ આગ ભભૂકી ઉઠી. નાફેડ દ્વારા ટેકાના ભાવે ખરીદાયેલી 1.5 લાખથી વધુ મગફળીની બોરીઓ ધૂ-ધૂ બળી રહી છે. આગની ભયાનકતાને જોતા ફાયર વિભાગે ‘મેજર કોલ’ જાહેર કરી મોરબી, રાજકોટ અને વાંકાનેરની ટીમોને બોલાવી છે. હાલમાં કરોડોના જથ્થાને નુકસાન થવાની ભીતિ છે.
રફાળેશ્વર GIDCમાં ધૂ-ધૂ બળ્યું મગફળીનું ગોડાઉન
આજે રફાળેશ્વર GIDC વિસ્તારમાં આવેલા નાફેડના ગોડાઉનમાં અચાનક આગ લાગતા આખો વિસ્તાર ધુમાડાથી ઘેરાઈ ગયો. ગોડાઉનમાં સૌરાષ્ટ્રભરમાંથી એકત્રિત કરેલી મગફળીનો જથ્થો રાખવામાં આવ્યો હતો. એક ગુણીમાં 35 કિલોના હિસાબે કુલ 1.59 લાખ ગુણી એટલે કે આશરે 55.65 લાખ કિલો મગફળી અહીં સંગ્રહિત હતી. આગ લાગતા જ સમગ્ર જથ્થો સળગવા લાગ્યો.
9 દિવસથી બંધ હતું ગોડાઉન, કારણ અસ્પષ્ટ
ગોડાઉનમાં જીવાત ન થાય તે માટે 9 દિવસ પહેલા ફ્યુમિગેશન કરીને તેને સંપૂર્ણ સીલ કરી દેવામાં આવ્યું હતું. મેનેજરના કહેવા મુજબ અંદર ફાયર સેફ્ટીના સાધનો અને CCTV પણ લગાવેલા હતા. બંધ ગોડાઉનમાં આગ કેવી રીતે લાગી તે હજુ અકબંધ છે. પોલીસ હવે CCTV ફૂટેજ ચકાસીને આગનું કારણ શોધી રહી છે.
મોરબી-રાજકોટ-વાંકાનેરની ટીમો મેદાને
આગની તીવ્રતા જોતા ફાયર બ્રિગેડે મેજર કોલ જાહેર કર્યો. મોરબીની 4 ફાયર ફાઈટર સાથે રાજકોટથી 2 અને વાંકાનેરથી 1 ગાડી તાત્કાલિક ઘટનાસ્થળે પહોંચી. આગને કાબૂમાં લેવા માટે નજીકમાં જ પાણીનો હોજ ભરીને સત પાણીનો મારો ચલાવાઈ રહ્યો છે. ફાયરની ટીમો છેલ્લા કલાકોથી સત કામગીરી કરી રહી છે.
કરોડોનું નુકસાન, જાનહાનિ નહીં
પ્રાથમિક અંદાજ મુજબ સળગેલી મગફળીની કિંમત કરોડોમાં છે. આગને કારણે ગોડાઉનની છત અને અંદરનો મોટાભાગનો જથ્થો નાશ પામ્યો છે. રાહતની વાત એ છે કે ઘટનામાં કોઈ જાનહાનિના સમાચાર નથી. પોલીસ અને ફાયર વિભાગની પ્રાથમિક તપાસ બાદ જ આગનું ચોક્કસ કારણ અને કુલ નુકસાનનો આંકડો સ્પષ્ટ થશે.
