દંડ નહીં ભરો તો વાહન જપ્ત થશે: ગુજરાતમાં નવી ટ્રાફિક ચલણ વ્યવસ્થા ‘નેક્સ્ટ જનરેશન ચલણ સિસ્ટમ’ લાગુ
રાજ્યમાં ટ્રાફિક વ્યવસ્થાને વધુ પારદર્શક, ઝડપી અને સંપૂર્ણપણે ડિજિટલ બનાવવાના હેતુથી ગુજરાત સરકારે ૧૨મી ઓગસ્ટથી ‘નેક્સ્ટ જનરેશન ચલણ સિસ્ટમ’ અમલમાં મૂકી દીધી છે. આ નવી ડિજિટલ સિસ્ટમથી ટ્રાફિક નિયમોના ભંગ બદલ ઈ-ચલણ મોકલવાથી લઈને તેના નિવારણ અને દંડ વસૂલાત સુધીની સમગ્ર પ્રક્રિયા માટે ચોક્કસ સમયમર્યાદા (ટાઈમલાઈન) નક્કી કરવામાં આવી છે, જેથી નિયમ ભંગ કરનારાઓ સામે કડક શિસ્ત સ્થાપિત કરી શકાય.
નવા નિયમોની ટાઈમલાઈન શું છે?
નવા નિયમો અંતર્ગત ટ્રાફિક ભંગ કરનાર વાહનચાલકો માટે નીચે મુજબની સમયમર્યાદા નક્કી કરવામાં આવી છે:
૩ દિવસમાં ઈ-ચલણ: નિયમ ભંગ કર્યાના માત્ર ૩ દિવસની અંદર જ વાહનચાલકને ડિજિટલ માધ્યમથી (SMS કે ઈ-મેઈલ દ્વારા) ઈ-ચલણ મોકલી દેવામાં આવશે.
૧૫ દિવસમાં ફિઝિકલ ચલણ: જો ભૌતિક (કાગળ પરનું) ચલણ મોકલવાનું હોય, તો તેની સમયમર્યાદા ૧૫ દિવસ નક્કી કરાઈ છે.
૪૫ દિવસ અપીલ માટે: જો વાહનચાલકને ચલણ સામે કોઈ વાંધો હોય, તો તે ઓથોરિટી સમક્ષ અપીલ કરવા માટે ૪૫ દિવસ નો સમય મેળવી શકશે. જો આ મુદતમાં અપીલ ન થાય, તો દંડ સ્વીકાર્યો ગણાશે.
૩૦ દિવસ દંડ ભરવા માટે: દંડની રકમ ઓનલાઈન ભરપાઈ કરવા માટે વાહનચાલકને વધુ ૩૦ દિવસ નો સમય આપવામાં આવશે.
દંડ ન ભરો તો શું થશે? – સૌથી કડક કાર્યવાહી
આ જ નવી સિસ્ટમનો સૌથી કડક ભાગ છે. નિર્ધારિત સમયમાં દંડ ન ભરો તો:
‘Not to be Transacted’ ટેગ: કેન્દ્રીય VAHAN પોર્ટલ પર તમારા વાહન સામે આ નોંધ થઈ જશે. ત્યારબાદ વાહનની લે-વેચ, નામ ટ્રાન્સફર, RTOનું કોઈ પણ કામ અટકી જશે.
વાહન ડિટેઈન/જપ્તી: ખૂબ ગંભીર કેસ અથવા લાંબા સમયથી બાકી દંડ હોય તો ટ્રાફિક પોલીસ સીધા વાહનને ડિટેઈન પણ કરી શકશે.
લાયસન્સ સસ્પેન્ડ: વારંવાર નિયમ ભંગ કરનારા અને દંડ ન ભરનારા વાહનચાલકોનું ડ્રાઇવિંગ લાયસન્સ પણ સસ્પેન્ડ થઈ શકે છે.
દંડ કેવી રીતે ચકાસવો અને ભરવો?
વાહનચાલકો ઘરે બેઠા જ ચલણ ચકાસી અને ભરી શકશે.
પગલાં: સત્તાવાર પરિવહન ઈ-ચલણ પોર્ટલ પર જઈને પોતાનો વાહન નંબર અથવા ચલણ નંબર નાખીને વિગતો ચેક કરી શકો છો અને UPI, કાર્ડથી તરત જ દંડ ભરી શકો છો.
સિસ્ટમનો હેતુ શું છે?
રાજ્ય સરકારનો ઉદ્દેશ ટ્રાફિક વ્યવસ્થાને વધુ પારદર્શક, ઝડપી અને ડિજિટલ બનાવવાનો છે. આ નવી સિસ્ટમથી બે ફાયદા થશે:
- વાહનચાલકોને સમયસર જાણ થઈ જશે અને સમય મળશે
- બાકી દંડની રકમમાં ઘટાડો થશે અને નિયમોનું પાલન વધશે
તો હવે હેલ્મેટ, સીટબેલ્ટ, સ્પીડ અને સિગ્નલના નિયમોનું કડકાઈથી પાલન કરો. કારણ કે આ વખતે દંડ સાથે તમારું વાહન પણ અટકી શકે છે.
