ગાંધીનગરના ‘છ’ રોડ પર તટ રક્ષક સર્કલનું ભવ્ય લોકાર્પણ

હર્ષ સંઘવીએ કહ્યું – ‘દરિયાના પ્રહરીઓને સલામ   

ગુજરાતની રાજધાની ગાંધીનગર હવે વધુ એક આકર્ષક લેન્ડમાર્કથી ઝળહળશે. શહેરના છ રોડ પર સેક્ટર-19 નજીક નિર્મિત તટ રક્ષક સર્કલનું નાયબ મુખ્યમંત્રી હર્ષ સંઘવીના હસ્તે ભવ્ય ઉદ્ઘાટન કરવામાં આવ્યું. કોસ્ટ ગાર્ડની પ્રતિકૃતિઓથી શણગારાયેલું આ સર્કલ માત્ર શહેરનું સૌંદર્ય વધારશે જ નહીં, પરંતુ દરિયાઈ સુરક્ષા દળના શૌર્ય અને સમર્પણને પણ સલામ કરશે. ઉદ્ઘાટન પ્રસંગે હર્ષ સંઘવીએ કોસ્ટ ગાર્ડની દેશસેવાની ભૂમિકાને બિરદાવી અને યુવાનોને પ્રેરણા મળશે તેવી આશા વ્યક્ત કરી.

ગાંધીનગરના મુખ્ય માર્ગ છ રોડ પર સેક્ટર-19 પાસે બનાવાયેલા આ સર્કલનું લોકાર્પણ એક વિશેષ સમારોહ સાથે કરવામાં આવ્યું. આ પ્રસંગે કોસ્ટ ગાર્ડના વરિષ્ઠ અધિકારીઓ, સ્થાનિક નેતાઓ અને અનેક મહાનુભાવો ઉપસ્થિત રહ્યા હતા.

કોસ્ટ ગાર્ડના શૌર્યને સલામ 

ઉદ્ઘાટન બાદ સંબોધન કરતા નાયબ મુખ્યમંત્રી હર્ષ સંઘવીએ ભારતીય તટ રક્ષક દળની દેશસેવામાં રહેલી મહત્વપૂર્ણ ભૂમિકાની પ્રશંસા કરી. તેમણે કહ્યું કે કોસ્ટ ગાર્ડ 24×7 દરિયાઈ સુરક્ષા, દાણચોરી રોકવા, માછીમારોના બચાવ અને આપત્તિ સમયે રાહત કામગીરીમાં લાગેલું રહે છે. આ સર્કલ દ્વારા લોકો, ખાસ કરીને યુવાનોને કોસ્ટ ગાર્ડની જવાબદારીઓ વિશે જાણકારી મળશે અને દેશસેવા માટે પ્રેરણા મળશે.

આ પણ વાંચો: તારા પહેલા સાસરીવાળા મારકૂટ કરતા તો ત્યાં કેમ સહન કરતી? કહી પત્નીને મારકૂટ

પ્રતિકૃતિથી સજેલું અનોખું સર્કલ 

આ સર્કલની ખાસિયત એ છે કે તેનું ડિઝાઇનિંગ કોસ્ટ ગાર્ડની વિવિધ કામગીરીઓને ધ્યાનમાં રાખીને કરાયું છે. સર્કલમાં દરિયાઈ સુરક્ષા, બચાવ કામગીરી, આપત્તિ સમયે મદ અને જળસીમાની સુરક્ષાની પ્રતિકૃતિઓ સ્થાપવામાં આવી છે. આ પ્રતિકૃતિઓ દ્વારા કોસ્ટ ગાર્ડ જવાનોના સમર્પણ અને ફરજ પ્રત્યેની નિષ્ઠાને પ્રતીકાત્મક રીતે રજૂ કરવામાં આવી છે.

નવું આકર્ષણ, નવી ઓળખ 

છ રોડ જેવા મહત્વના માર્ગ પર આવેલું હોવાથી આ તટ રક્ષક સર્કલ હવે સ્થાનિકો અને પ્રવાસીઓ માટે આકર્ષણનું કેન્દ્ર બનશે. કોસ્ટ ગાર્ડના અધિકારીઓએ આ પહેલને આવકારીને જણાવ્યું કે આવા સ્મારકોથી સુરક્ષા દળો અને સામાન્ય નાગરિકો વચ્ચે સેતુ બને છે. ગાંધીનગરની ઓળખમાં આ સર્કલ હવે મહત્વનો ઉમેરો કરશે અને દેશની સુરક્ષા માટે સતર્ક રહેતા જવાનોને સન્માન આપતું સ્મારક બની રહેશે. આ સર્કલ સાથે ગાંધીનગરે ફરી એકવાર સાબિત કર્યું કે વિકાસ સાથે દેશભક્તિની ભાવના પણ જીવંત રાખી શકાય છે.