‘ગેંગ્સ ઓફ રાજકોટ’ ઉપર જનોઈવઢ ઘા : વધુ 21 સામે ગુજસીટોકનો ગુનો દાખલ,જાણો ગેંગનું નામ ‘મુરઘાગેંગ’ શા માટે પડ્યું?
રાજકોટમાં ઘણા લાંબા સમય બાદ બે કુખ્યાત વચ્ચે થયેલી ગેંગવોરે કાયદાની ધજ્જીયા ઉડાવી દેતાં પોલીસે કડક બની ગેંગનો ખાત્મો કરવા માટે તમામ હથિયારનો ઉપયોગ કરી લેવાની તૈયારી શરૂ કરી દેવામાં આવી હતી. પેંડાગેંગ અને મુરઘા ગેંગના ટપોરીઓ વચ્ચે મંગળા મેઈન રોડ ઉપર 29 ઑક્ટોબરની વહેલી સવારે 3ઃ30 વાગ્યે સામસામું ફાયરિંગ થયાના બનાવે શહેરની કાયદો-વ્યવસ્થા ચીથરેહાલ હોવાના પૂરાવા આપી દેતાં પોલીસે શરમજનક સ્થિતિમાં મુકાવવું પડ્યું હતું. આ પછી ગેંગ્સ ઉપર તૂટી પડવા પોલીસને છૂટો દોર મળી જતાં બન્ને ગેંગના કુલ 33 ગુંડાઓને પકડી પાડી ક્યારેય ન મળ્યો હોય તેવો બોધપાઠ આપવામાં આવ્યો હતો. આ પછી ક્રાઈમ બ્રાન્ચ દ્વારા પેંડા ગેંગના 17 સામે ગુજસીટોક હેઠળ ગુનો દાખલ કરી અલગ-અલગ જેલમાં ધકેલી દેવાયા બાદ હવે મુરઘા ગેંગના 21 સામે પણ ગુજસીટોકનું હથિયાર વાપરવામાં આવ્યું છે.
શહેરમાંથી ગેંગ શબ્દ જ નીકળી જાય તે માટે ક્રાઈમ બ્રાન્ચ દ્વારા ગુજરાતમાં ક્યારેય ન કરાઈ હોય એટલી સંખ્યામાં આરોપીઓ સામે ગુજસીટોક હેઠળ ગુનો દાખલ કરવામાં આવ્યો છે. મુરઘા ગેંગની વાત કરવામાં આવે તો આ ગેંગ ગમે ત્યાં દાદાગીરી કરવી, ટોળારૂપે મારામારી કરવી, ઘરમાં ઘૂસી તોડફોડ કરવી, પોલીસ સહિતના સરકારી કર્મચારીઓ-અધિકારીઓ ઉપર હુમલા કરવા, ધમકીઓ આપવી, હથિયાર-ડ્રગ્સ, દારૂ સહિતની હેરાફેરી કરવા, ચોરી સહિતા કુલ 30 ગુના દસ વર્ષની અંદર નોંધાયેલા છે.
આ અંગે યોજાયેલી પત્રકાર પરિષદને સંબોધન કરતા ડીસીપી ક્રાઈમ જગદીશ બાંગરવાએ જણાવ્યું કે મુરઘા ગેંગના 21માંથી 16 આરોપીઓ પોલીસના સકંજામાં છે જ્યારે ગેંગનો લીડર સમીર ઉર્ફે સંજલો જાવિદભાઈ જુણેજા સહિત પાંચ લોકોની શોધખોળ ચાલી રહી છે. આ પાંચેયને પકડવા અત્યારે અલગ-અલગ ટીમ દોડધામ કરી રહી છે. આ ગેંગ દ્વારા એક સાથે મળીને અનેક ગુનાને અંજામ આપવામાં આવ્યો હોવાથી તેની સામે ગુજસીટોક હેઠળ કાર્યવાહી કરાઈ છે. અગાઉ જેને ગુજસીટોક હેઠળ જેલમાં ધકેલવામાં આવી તે પેંડા ગેંગ સામે કુલ 74 ગુના નોંધાયેલા છે જ્યારે મુરઘા ગેંગ સામે 30 ગુના નોંધાયેલા હોય ગુનાખોરીનો આંકડો જ ગેંગના ભયની ગવાહી પૂરી રહ્યો છે.
19 દિવસમાં બન્ને ગેંગના મળી 38 સામે ગુજસીટોક હેઠળ ગુનો દાખલ
ગેંગવોરે પોલીસની રહીસહી આબરૂને જબદરસ્ત ધક્કો માર્યો હોવાને કારણે કડકમાં કડક કાર્યવાહી કરવા માટે ધાર સજાવી પોલીસે 19 દિવસના ટૂંકા ગાળામાં બન્ને ગેંગના મળી 38 સામે ગુજસીટોક હેઠળ ગુનો દાખલ કર્યો છે જે ગુજરાતના ઈતિહાસનો સૌથી મોટો આંકડો છે. અગાઉ કોઈ શહેર-જિલ્લામાં આટલી સંખ્યામાં ગુનેગારો ઉપર ગુજસીટોક હેઠળ કાર્યવાહી કરાઈ નથી. ડીસીપી ક્રાઈમ જગદીશ બાંગરવા, એસીપી ક્રાઈમ ભરત બસીયા, ક્રાઈમ બ્રાન્ચ પીઆઈ એમ.આર.ગોંડલિયા, એમ.એલ.ડામોર, સી.એચ.જાદવ, એસઓજી પીઆઈ એસ.એમ.જાડેજા ઉપરાંત પીએસઆઈ ચંદ્રસિંહ જાડેજા, એ.એન.પરમાર, વી.ડી.ડોડિયા, એ.એસ.ગરચર, એમ.કે.મોવલિયા સહિતની ટીમે આરોપીઓને પકડવાથી લઈ મજબૂત કાગળ તૈયાર કરવા સહિતની કાર્યવાહી કરી હતી.
ગેંગનું નામ `મુરઘાગેંગ’ શા માટે પડ્યું ?
અગાઉ જેની સામે ગુજસીટોક હેઠળ ગુનો દાખલ કરાયો તે પેંડાગેંગનું નામ `પેંડાગેંગ’ કેવી રીતે પડ્યું તે મુદ્દો પણ રસપ્રદ હતો. એ ગેંગના ગુંડાઓએ પોતાના લીડર શક્તિ ઉર્ફે પેંડો કે જે મોતને ભેટ્યો છે તેની યાદમાં ગેંગનું નામ પેંડાગેંગ પાડ્યું હતું. જ્યારે મુરઘાગેંગનો સૂત્રધાર સમીર ઉર્ફે મુરઘો કે જે મુરઘી વેચવાનું કામ કરતો હોય ટોળકીએ તેનું નામ મુરઘો પાડી દીધું હતું. આ રીતે મુરઘીના વેચાણના આધારે ગેંગનું નામકરણ થયું હોવાનું પોલીસ સૂત્રોએ જણાવ્યું હતું.
મુરઘા ગેંગના કેટલા આરોપી સકંજામાં ?
- સમીર ઉર્ફે મુરઘો યાસીનભાઈ પઠાણ
- શાહનવાઝ ઉર્ફે નવાઝ મુસ્તાકભાઈ વેતરણ
- સોહિલ ઉર્ફે ભાણો સિકંદરભાઈ ચાનીયા
- સલમાન નનકેભાઈ ફકીર
- શાહજહા ઉર્ફે ગોટીયો સુલેમાનભાઈ ઉર્ફે કાળુ વશીર
- ઈરફાન ઉર્ફે મુન્નો ઉર્ફે જીમી આમદભાઈ જુણાચ
- તેજીમ રફીકભાઈ ફુફાર
- મુજકીર ઉર્ફે મુજુડો દિલાવરભાઈ બ્લોચ
- સરફરાઝ ઉર્ફે સેફુડો ઈકબાલભાઈ ખેડારા
- અહેમદ ઉર્ફે દુડી રફીકભાઈ બકાલી
- સતાર ઉર્ફે મેંગણી સીદીકભાઈ દોઢીયા
- અંજુમ ઈસ્માઈલભાઈ ખીયાણી
- સમીર સિકંદરભાઈ ચાનીયા
- દિનેશ હકાભાઈ રીબડીયા
- હમીઝ ઉર્ફે ભાણો હારૂનભાઈ હેરંજા
