Exclusive : ડ્રાઈવરે બ્રેકની જગ્યાએ લીવર જ દબાવ્યું હતું ! રાજકોટ સિટી બસ અકસ્માત મામલે ‘ફેક્ટ ફાઈન્ડિંગ કમિટી’નો રિપોર્ટ

ગત 16 એપ્રિલે શહેરના ટ્રાફિકથી ધમધમતાં ઈન્દિરા સર્કલ પાસે સિટી બસ હેઠળ ચાર નિર્દોષ નાગરિકો કચડાઈ ગયાની દૂર્ઘટના બન્યા બાદ લોકોનો સિટી બસ ઉપર રોષ ફાટી નીકળ્યો હતો અને આખરે આ ગંભીર પ્રકારની દૂર્ઘટના બની જ કેવી રીતે તેને લઈને તરેહ તરેહના દાવાઓ તેમજ ચર્ચાઓ શરૂ થઈ જવા પામ્યા હતા. ત્યારે સૌ એવા પ્રશ્નો પૂછી રહ્યા હતા કે શું બસમાં કોઈ ખામી હતી ? ડ્રાઈવર નશામાં કે બીમાર હતો ? આ સહિતના સવાલોના જવાબ શોધવા માટે મ્યુનિસિપલ કમિશનર દ્વારા દૂર્ઘટનાના બીજા જ દિવસે `ફેક્ટ ફાઈન્ડિંગ કમિટી’ની રચના કરી રિપોર્ટ સોંપવા આદેશ કરાયા બાદ કમિટી દ્વારા રિપોર્ટ તૈયાર કરી લેવામાં આવ્યો છે અને તેમાં ફલિત થયું છે કે ડ્રાઈવરે બ્રેકની જગ્યાએ લીવર ઉપર જ પગ મુકી દેતાં આ ગોઝારો બનાવ બનવા પામ્યો હતો !

આ અંગે ફેક્ટ ફાઈન્ડિંગ કમિટીમાં સામેલ એક અધિકારીએ જણાવ્યું કે ઘટનાનો વીડિયો જોયા બાદ એમ લાગતું હતું કે બસમાં કોઈ ટેક્નીકલ ખામીને કારણે ડ્રાઈવર બ્રેક  મારી શક્યો ન્હોતો. જો કે ઓડિયો સાંભળવાનું જ જાણે કે રહી ગયું હોય તેમ તે દિશામાં ધ્યાન આપી શકાયું ન્હોતું પરંતુ કમિટી દ્વારા બસની અંદર રહેલા કેમેરાનો ઓડિયો ધ્યાનપૂર્વક સાંભળવામાં આવતાં તેમાં સ્પષ્ટ થઈ રહ્યું છે કે ડ્રાઈવરે બ્રેક ની જગ્યાએ લીવર દબાવી દેતાં બસની સ્પીડ વધી ગઈ હતી અને કાબૂ બહાર ચાલી જતાં એક બાદ એક ચાર લોકોને કચડી નાખ્યા હતા.

કમિટી દ્વારા આ સહિતના અનેક મુદ્દા રિપોર્ટમાં આવરી લેવામાં આવ્યા છે જેની ટૂંક સમયમાં જ સત્તાવાર વિગતો જાહેર કરવામાં આવશે. આ ઉપરાંત ભવિષ્યમાં આવી ઘટના ન બને તે માટે કમિટી દ્વારા અનેક સુધારા સુચવવામાં આવ્યા છે જેમાં ડ્રાઈવરોના કામના કલાક નક્કી કરવા, નિયમિત મેડિકલ ચેકઅપ કરાવવા સહિતનો સમાવેશ થાય છે જેનો અમલ તુરંતમાં શરૂ કરી દેવામાં આવ્યો છે. આ સિવાયના જે સુચન કરવામાં આવ્યા છે તેનો પણ ઝડપથી અમલ શરૂ કરવામાં આવશે.

આ પણ વાંચો : લાપત્તા ગુજરાતી ફિલ્મમેકર મહેશ જીરાવાલાનું અમદાવાદનાં પ્લેન ક્રેશમાં મોત : DNA મેચ થતાં મૃતદેહ પરિજનોને સોંપાયો

ફેક્ટ ફાઈન્ડિંગ કમિટીમાં સામેલ સભ્યો

• ડેપ્યુટી કમિશનર ટ્રાફિક એન્ડ ટ્રાન્સપોર્ટ શાખા
• જનરલ મેનેજર (રાજકોટ રાજપથ લિમિટેડ)
• મેનેજર (RRL)
• સિટી ઈજનેર (રોશની શાખા)
• સિટી ઈજનેર (મીકેનીકલ વર્કશોપ શાખા)
• એસીપી (વેસ્ટ)
• RTO ઓફિસર
• ટેક્નીકલ એક્સપર્ટ (સેપ્ટ યુનિવર્સિટી)
• ટેક્નીકલ એક્સપર્ટ (SVN IT)
• ટેક્નીકલ એક્સપર્ટ (મિકેનિકલ વિભાગ, GEC-રાજકોટ)
• – ટેક્નીકલ એક્સપર્ટ (IR ક્લાસ)