રાજકોટમાં લગ્ન માટે નહીં પણ મતદારો માટે ઢોલ ઢબુક્યા!મતદારોને જાગૃત કરવા માટે અપનાવી નવતર પહેલ
રાજકોટ સહિત રાજ્યભરમાં SIRની કામગીરી અન્વયે મતદારોને ગણતરી ફોર્મ આપ્યા બાદ આવા ફોર્મ પરત મેળવી મતદારોની વિગતોનું ડિજિટાઇઝેશન ચાલી રહ્યું છે. જો કે, રાજકોટ જિલ્લામાં ગ્રામ્ય મતદારોની તુલનાએ શહેરી મતદારો પ્રમાણમાં ઉત્સાહિત ન હોય 68-રાજકોટ વિધાનસભા મતક્ષેત્રના રિટર્નિંગ ઓફિસર દ્વારા મતદારોને સત્વરે SIR ફોર્મ પરત આપવા અપીલ કરવા ઢોલની દાંડી પિટાવાની સાથે જ રેડિયો જોકીની મદદ લઈ તેમના મતક્ષેત્રમાં નોંધાયેલ મતદારોને ફટાફટ એન્યુમરેશન ફોર્મ જમા કરાવવા અનુરોધ કર્યો હતો.
રાજકોટ જિલ્લામાં છેલ્લા 24 દિવસથી ચાલી રહેલ એસઆઇઆરની કામગીરી અન્વયે આઠેય વિધાનસભા બેઠકમાં કુલ 86 ટકા જેટલા મતદારોએ ગણતરી ફોર્મ ભરી પરત કરી દીધા છે. જો કે, રાજકોટ જિલ્લાની ગ્રામ્ય વિધાનસભા બેઠકની તુલનાએ શહેરની ચારેય વિધાનસભા બેઠકમાં મતદારો પ્રમાણમાં નિરુત્સાહ રહયા હોવાથી સરેરાશ 75થી 80 ટકા જેટલા મતદારોના જ ફફોર્મ પરત આવ્યા છે. બીજી તરફ મતદારોમાં જાગૃતિ આવે અને સત્વરે બાકી રહેતા મતદારો પોતાના ગણતરી ફોર્મ બીએલઓ પાસે જમા કરાવે તે માટે 68-રાજકોટ પૂર્વ વિધાનસભા બેઠકમાં રીટર્નીંગ ઓફિસર અજય ઝાપડા દ્વારા નવતર પ્રયોગ કરી અગાઉ તેમના મતક્ષેત્રમાં માઈક સાથે રીક્ષા ફેરવ્યા બાદ છેલ્લા બે દિવસથી ગામડામાં જે રીતે લોકોને સૂચિત કરવા ઢોલ પિટાઈ તે જ રીતે તેમના મતક્ષેત્રમાં ઢોલની દાંડીએ લોકોને સત્વરે પોતાના એન્યુમરેશન ફોર્મ પરત જમા કરાવવા સૂચના આપવામાં આવી રહી છે.
68-રાજકોટ વિધાનસભા મતક્ષેત્રના રીટર્નીંગ ઓફિસર અજય ઝાપડાએ ઉમેર્યું હતું કે, SIR અંતર્ગત મતદારોમાં જાગૃતિ લાવવા અમારો આ નાનકડો પ્રયાસ છે, કોઈપણ મતદાર SIR કાર્યવાહી અંતર્ગત મતદારયાદીમાંથી તેમનું સ્થાન ન ગુમાવે તે માટે જાગૃતિ માટે ઢોલની દાંડી પિટવાની સાથે જાણીતા રેડિયો જોકી અજયસિંહ પણ 68 રાજકોટ પૂર્વ વિધાનસભા મતક્ષેત્રમાં આગવા અંદાજમાં લોકોને વહેલી તકે પોતાના ગણતરી ફોર્મ બીએલઓ પાસે જમા કરાવવા માટે સમજુત કરી રહ્યા હોવાનું તેમને જણાવ્યું હતું. વધુમાં રિટર્નિંગ ઓફિસરે ઉમેર્યું હતું કે, આજે શનિવારે અને કાલે રવિવારે તમામ મતદાન મથક, મહાનગર પાલિકા વોર્ડ નં. 3, 4, 5, 6, 15,16, 18 ની કચેરી તેમજ મામલતદાર કચેરી, રાજકોટ શહેર (પૂર્વ), જુની કલેકટર કચેરી કમ્પાઉડ, આઈ.પી. મીશન સ્કુલ સામે, રાજકોટ ખાતે મેગા ફોર્મ કલેક્શન કેમ્પનું પણ આયોજન કર્યું હોય મતદારોને તેમના ફોર્મ ભરી જમા કરાવવા અનુરોધ કર્યો હતો.
