અરબી સમુદ્રમાં ડિપ્રેશન : આજથી છ દિવસ સૌરાષ્ટ્ર-દક્ષિણ ગુજરાતમાં અતિભારે વરસાદની આગાહી

અરબી સમુદ્રમાં કર્ણાટકા અને ગોવાના દરિયાકાંઠા વિસ્તારમાં લોપ્રેશર સર્જાયું છે જે આગામી 36 કલાકમાં ઉત્તર દિશામાં આગળ વધુ તીવ્ર ડિપ્રેશનમાં ફેરવાઈ જવાની શક્યતા હવામાન વિભાગે વ્યક્ત કરી છે. સાથે જ આ ડિપ્રેશનને કારણે સૌરાષ્ટ્ર અને દક્ષિણ ગુજરાતમાં આગામી 6 દિવસ સુધી ભારેથી અતિભારે વરસાદ પડવાની આગાહી આપી વરસાદનું યલો તેમજ ઓરેન્જ એલર્ટ પણ આપ્યું.નોંધનીય છે કે, મંગળવાર સાંજથી રાજ્યમાં વરસાદનો રાઉન્ડ શરૂ થયો છે જેમાં સૌરાષ્ટ્રમાં એક મીમીથી લઈ અઢી ઈંચ સુધી વરસાદ વરસ્યો હતો.

હવામાન વિભાગના જણાવ્યા મુજબ ઉત્તરપૂર્વ રાજસ્થાન અને નજીકના દક્ષિણ હરિયાણા પર હવાનું ચક્રવાત પરિભ્રમણ છે તેમજ ઉત્તર કર્ણાટક-ગોવા કિનારાથી પૂર્વ મધ્ય અરબી સમુદ્ર ઉપર મધ્ય-ઉષ્ણકટિબંધીય સ્તર હવાનું ચક્રવાત પરિભ્રમણ વિસ્તરેલું છે, જેના પ્રભાવ હેઠળ, આગામી 12 કલાક દરમિયાન લોપ્રેસર બનવાની સંભાવના છે. ત્યારબાદ, આ લો પ્રેસર ઉત્તર તરફ આગળ વધવાની સાથે આગામી 36 કલાક દરમિયાન ડિપ્રેશનમાં ફેરવાઈ વધુ તીવ્ર બનશે જેને કારણે આગામી છ દિવસ સુધી સૌરાષ્ટ્ર અને દક્ષિણ ગુજરાતમાં ભારેથી અતિભારે વરસાદ વરસવા અંગે ઓરેન્જ તેમજ યલો એલર્ટ આપવામાં આવ્યું છે.

વધુમાં અરબી સમુદ્રમાં ડિપ્રેશનને કારણે 50થી 60 કિમી પ્રતિ કલાકની ઝડપે પવન ફૂંકાશે. સાથે જ ગાજવીજ સાથે દક્ષિણ ગુજરાતના ભરૂચ, સુરત, ડાંગ, નવસારી, વલસાડ, તાપી અને દમણ, દાદરા નગર હવેલીમાં છૂટાછવાયા સ્થળોએ મધ્યમ વરસાદની શક્યતા છે. તેમજ સૌરાષ્ટ્રમાં રાજકોટ, જૂનાગઢ, અમરેલી, ભાવનગર, ગીર સોમનાથ અને દીવ તેમજ  છૂટાછવાયા સ્થળોએ ભારે વરસાદની પણ શક્યતા છે.ઉપરાંત બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ, મહિસાગર; સૌરાષ્ટ્ર-કચ્છના જિલ્લાઓમાં વડોદરા, છોટા ઉદેપુર, નર્મદા સુરેન્દ્રનગર, જામનગર, પોરબંદર, મોરબી, દ્વારકા, બોટાદ અને કચ્છમાં પણ છુટાછવાયા સ્થળે વરસાદની આગાહી કરવામાં આવી છે.