રાજકોટમાં જામશે ક્રિકેટ ફીવર : નીરંજન શાહ સ્ટેડિયમમાં ઈન્ડિયા ‘એ’ અને આફ્રિકા ‘એ’ વચ્ચે રમાશે ત્રણ વન-ડે મેચ
આગામી નવેમ્બર મહિનામાં રાજકોટના ક્રિકેટ સ્ટેડિયમ પર ઈન્ડિયા `એ’ અને આફ્રિકા `એ’ ટીમ વચ્ચે ત્રણ વન-ડે મેચની શ્રેણી રમાનાર હોવાની જાહેરાત BCCI દ્વારા કરવામાં આવી હતી. આ ઉપરાંત ક્રિકેટ બોર્ડે ઘરેલું સીઝનના અમુક સ્થળમાં પણ ફેરફાર કર્યા હતા. ભારત-વિન્ડિઝ વચ્ચે ઑક્ટોબર-2025માં રમાનારો બીજો ટેસ્ટ મુકાબલો હવે કોલકત્તાની જગ્યાએ દિલ્હીમાં રમાશે. જ્યારે ભારત-આફ્રિકા વચ્ચે નવેમ્બરમાં રમાનારી પહેલી ટેસ્ટ મેચ દિલ્હીની જગ્યાએ કોલકત્તામાં રમાશે.
ભારત-વેસ્ટ ઈન્ડિઝ વચ્ચે બે મેચની ટેસ્ટ શ્રેણીનો પ્રથમ મુકાબલો બે ઑક્ટોબરે અમદાવાદમાં રમાશે અને ત્યારબાદ બીજી ટેસ્ટ દિલ્હીમાં રમાશે. ભારતીય ટીમ ત્યારબાદ વિવિધ સ્થળે આફ્રિકા વિરુદ્ધ ત્રણેય ફોર્મેટની શ્રેણી રમશે જેમાં બે ટેસ્ટ, ત્રણ વન-ડે અને પાંચ ટી-20 આંતરરાષ્ટ્રીય મેચ સમાવિષ્ટ છે.
આ પણ વાંચો : 15 વર્ષ બાદ રાજકોટમાં મનપાની ચોથી ઝોનલ કચેરીનો પાયો ખોદાયો : વર્ષ 2027નાં પ્રારંભમાં ખુલ્લી મુકવામાં આવશે
દક્ષિણ આફ્રિકા વિરુદ્ધ કોલકત્તા પ્રથમ ટેસ્ટ મેચની યજમાની કરશે. જ્યારે ગૌહાટીના બારસાપારા સ્ટેડિયમ પર 22થી 26 નવેમ્બર સુધી શ્રેણીની બીજી ટેસ્ટ મેચ રમાશે. આફ્રિકા વિરુદ્ધ પહેલી વન-ડે મેચ 30 નવેમ્બરે રાંચીમાં, બીજી 3 ડિસેમ્બરે રાયપુરમાં, ત્રીજી છ ડિસેમ્બરે વિશાખાપટ્ટનમમાં રમાશે. આ પછી નવ ડિસેમ્બરથી ટી-20 શ્રેણી શરૂ થશે જેની મેચ કટક, ન્યુ ચંદીગઢ, ધર્મશાલા, લખનૌ અને અમદાવાદમાં રમાશે.
ચેન્નાઈના એમ.એ.ચિદમ્બરમ સ્ટેડિયમમાં આઉટફિલ્ડ અને પીચનું સમારકામ ચાલી રહ્યું હોય સીનિયર ટીમ ઈન્ડિયા (વિમેન્સ) અને ઑસ્ટ્રેલિયા વિમેન્સ વચ્ચે વન-ડે શ્રેણી હવે ચેન્નાઈની જગ્યાએ ન્યુ ચંદીગઢ અને દિલ્હીમાં રમાશે.
ભારતની પુરુષ ટીમ ઑસ્ટ્રેલિયા `એ’ અને દક્ષિણ આફ્રિકા `એ’ ટીમ સામે રમશે. આ બન્ને દેશ વિરુદ્ધ યુવા ખેલાડીઓથી સજ્જ ભારતની `એ’ ટીમ બે-બે ટેસ્ટ અને ત્રણ-ત્રણ વન-ડે રમશે. શ્રેણી પૈકી ભારત-આફ્રિકાની `એ’ ટીમ વચ્ચે ત્રણ વન-ડે મેચ રાજકોટમાં રમાશે.
