મહિલા ડોકટરે સાથે થયેલી કરોડોની છેતરપિંડીનો મામલો : આ બેન્કમાંથી રૂપિયા ઉપાડયા, જાણો કોના બેંક એકાઉન્ટ સામે થઇ ફરિયાદ?

ગાંધીનગરની મહિલા ગાયનેકોલોજિસ્ટને ડિજીટલ એરેસ્ટ કરીને તેમની પાસેથી ઓનલાઈન 19.24 કરોડ રૂપિયા પડાવવાના કેસમાં તપાસ કરી રહેલી સી.આઈ. ડી.ક્રાઈમની ટીમને એવી વિગત મળી છે કે મહિલા તબીબ પાસેથી નાણા પડાવવા માટે જુદા ઉદા 35 જેટલા બેન્ક એકાઉન્ટનો ઉપયોગ કરવામાં આવ્યો હતો. વધુમાં આ રકમ પૈકી 49.67 લાખ રૂપિયા રાજકોટ, જામનગર અને અમરેલીની બેન્કોમાં ચેક રજૂ કરીને ઉપાડી લેવામાં આવ્યા હતા. જે બેંકોમાંથી પૈસા ઉપાડવામાં આવ્યા હતા તેમાં રાજકોટ નાગરિક બેંકનો પણ સમાવેશ થતો હતો. આ નાણા મહિલા તબીબને પહેલો વિડીયો કોલ આવ્યો તેના ત્રણ દિવસ પછી ઉપાડવાનું શરુ થયું હતું. આ તપાસમાં એવી પણ વિગત બહાર આવી છે કે, સૌથી વધુ રકમ ફેડરલ બેન્કના જુદા જુદા 10 એકાઉન્ટમાં ટ્રાન્સફર કરવામાં આવી હતી.

તપાસનીસ અધિકારીઓ જુદા જુદા શહેરોને સાંકળતુ નેટવર્ક શોધી રહ્યા છે. આ કેસમાં જેનું નામ ઉછળ્યું છે તે લાલજી બલદાણીયા કે જેને 1.01 કરોડ રૂપિયા મળ્યા છે તેનું એકાઉન્ટ રાહુલ ચાવડા નામનો માણસ હેન્ડલ કરતો હતો. બલદાણીયાને કમિશન પેટે 2.18 લાખ રૂપિયા મળ્યા હતા. આ કેસમાં દિનેશ નામના એક શખસે બલદાણીયાને નોઈડા જવા માટે ફ્લાઈટની ટીકીટની વ્યવસ્થા કરી દીધી હતી.

આ પણ વાંચો : નવુ યુધ્ધ ગમે ત્યારે થઈ શકે છે : સેનાના વડા ઉપેન્દ્ર દ્વિવેદીનું નિવેદન, ગુજરાતના આ દરિયાકિનારે આવતીકાલથી નૌસેનાની ફાયરિંગ ડ્રિલ

બલદાણીયાએ નોઈડામાં જયદેવ, અમીર, નાઝ, નીલેશ, યશપાલ, ઈસ્માઈલ અને શબ્બીર જેવા ગેંગનાં સભ્યો સાથે મુલાકાત કરી હતી. આ બધા કોમ્બોડીયાનાં માસ્ટરમાઈન્ડ માટે કામ કરતા હતા અને તેમના વતી સાયબર ફ્રોડ આચરી કમિશનન મેળવતા હતા. આ એક આંતરરાષ્ટ્રીય ષડયંત્ર છે અને તેમાં દિલ્હી,મુંબઈ, આસામ, સિગાપુર અને કમ્બોડિયાનાં શખસોની સંડોવણી બહાર આવી છે.