હેન્ડલ લોક કર્યા વગરનું બાઈક રાખતા હોય તો ચેતજો! રાજકોટમાં માત્ર 7 મિનિટમાં બાઇક ગાયબ કરતી બેલડી ઝડપાઇ
રાજકોટમાં દરરોજ કોઈને કોઈ વિસ્તારમાંથી ટુ-વ્હીલર ચોરાઈ ગયાની પોલીસ ફરિયાદ નોંધાયા વગર રહેતી નથી. જેટલી ફરિયાદ નોંધાય છે તેના પ્રમાણમાં ચોરાઉ ટુ-વ્હીલર ઓછા મળી રહ્યા હોવાની વચ્ચે ક્રાઈમ બ્રાન્ચે બાઈકચોર બેલડીને દબોચી લઈ એક સાથે દસ બાઈક કબજે કર્યા હતા. આ બેલડી માત્ર સાત જ મિનિટમાં હેન્ડલ લોક કર્યા વગરનું બાઈક ચોરી કરી લેતી હોવાનું સામે આવ્યું હતું.
ક્રાઈમ બ્રાન્ચની ટીમે છેલ્લા છ મહિનાની અંદર રાજકોટમાંથી ત્રણ અને જામનગરમાંથી સાત બાઈકની ચોરી કરનાર મુળ પોરબંદરના દેગામના જયમલ મુરુભાઈ સુંડાવદરા (ઉ.વ.26) અને તેના સાગ્રીત લખમણ અરભમભાઈ ખુંટી (ઉ.વ.22, રહે.ખીરસરા-દેવભૂમિ દ્વારકા)ને ચોરાઉ દસ બાઈક સાથે પકડ્યા હતા. આ બન્નેએ સૌથી વધુ બાઈક જામનગરમાંથી ઉઠાવ્યા હોવાનું સામે આવ્યું હતું.
બન્ને બાઈકની ચોરી કરી લ્યે એટલે તેને દસથી બાર હજાર રૂપિયામાં વેચી નાખતા હતા. ચોરાઉ બાઈક મોટાભાગે ગામડામાં રહેતા ખેડૂતોને જ વેચતા હોવાની કબૂલાત આપી હતી. જયમલ અને લખમણ ખેડૂતોને શોધીને એમ કહેતા કે બાઈકના `હપ્તા ચડી ગયા હોવાથી સસ્તા ભાવે વેચવાનું છે’ વળી, જયમલને દારૂ સહિતનો નશો કરવાની આદત હોય તે ખર્ચ કાઢવા માટે ચોરીના રવાડે ચડી ગયો હતો. બન્ને પોતાની પાસે અલગ-અલગ ચાવી પણ રાખતા જે બાઈકમાં નાખી ચેક કરતા અને જો લાગી જાય તો ચોરી કરી લેતા અને જો ન લાગે તો ડાયરેક્ટ કરીને ચોરી જતા હતા.
