અમરેલી : બાબરાના ત્રંબોડા ગામની નદીમાં ઘોડાપૂર, બોલેરો કાર તણાઈ જતા ડ્રાઈવરનું મોત
ગુજરાતમાં હવે ચોમાસુ થોડે જ દુર હોય તેવું લાગી રહ્યું છે ત્યારે સૌરાષ્ટ્ર સહીત રાજ્યમાં છેલ્લા બે દિવસથી કેટલીક જગ્યાએ છુટા છવાયા વરસાદથી લઈને ધોધમાર વરસાદ વરસી રહ્યો છે . ત્યારે અમરેલી જીલ્લામાં મેઘરાજા વરસી રહ્યા છે. બાબરા પંથકમાં બે કલાકમાં ગામડાંઓમાં બે થી ત્રણ ઇંચ વરસાદ ખાબક્યો હતો. વરસાદના આગમનથી કાળઝાળ ગરમીથી લોકોને રાહત મળી છે.
વાત કરીએ બાબરા પંથકના ત્રબોડા ગામની તો સ્થાનિક નદીમાં ઘોડાપૂર આવ્યું છે. ત્રંબોડા ગામના સુખનાથ મંદિર પાસે નદીમાં બોલેરો ગાડી તણાઈ હતી ત્યારે સ્થાનિકો લોકોએ વહીવટી તંત્રને જાણ કરતા પોલીસ અને ફાયર ટીમ ઘટનાસ્થળે પહોચી હતી. બોલેરો ગાડીમાં ત્રણ જેટલા વ્યક્તિ સવાર હોવાની માહિતી હાલ મળી રહી છે ત્યારે અમરેલીની ફાયર ફાઈટરની ટીમ ઘટનાસ્થળે પહોંચીને રેસ્ક્યું ઓપરેશન હાથ ધર્યું છે.
ગામથી 1200 ફૂટ દૂર બોલેરો ગાડી મળી હતી જે બાદ બોલેરો ગાડીમાં સવાર મુસાફરો અંગે પોલીસ અને ફાયર ટીમેં તપાસ શરૂ કરી હતી. તપાસમાં સ્થાનિકો પણ જોડાયા હતા ત્યારે ઘટનાના કલાકો બાદ બોલેરોકારના ડ્રાઈવર અમરારામ જાટનો મૃતદેહ મળી આવ્યો હતો. ફાયર વિભાગ દ્વારા રેસ્કયુ ઓપરેશન વખતે કાંટાળી ઝાડીમાંથી ડ્રાઈવરનો મૃતદેહ મળ્યો હતો. 24 વર્ષીય રાજસ્થાની યુવકના મૃતદેહને પીએમ અર્થે સિવિલ હોસ્પિટલ ખસેડવામાં આવ્યો હતો.
રાજ્યમાં ગત 24 કલાકમાં 72 તાલુકામાં વરસાદ
રાજ્યના 72 તાલુકામાં ગત 24 કલાકમાં વરસાદ નોંધાયો છે. જેમાં સૌથી વધુ તાપી જિલ્લામાં ડોલવણમાં 3.5 ઇંચ અને વાલોડમાં 3.2 ઇંચ વરસાદ વરસ્યો છે. ગઇકાલે દક્ષિણ અને સૌરાષ્ટ્રના મોટાભાગના જિલ્લાઓમાં ભારે પવન સાથે વરસાદ વરસ્યો હતો. આજે પણ અનેક જિલ્લામાં વરસાદની હવામાન વિભાગની આગાહી છે.
