ACBની સફળ ટ્રેપ : આરોપીને માર ન મારવા માટે લાંચ લેતો PSIનો વચેટિયો ઝડપાયો
લાંચિયા લોકો સામે એસીબી સતત કામગીરી કરી રહ્યું છે, તેમ છતાં ઘણા બાબુઓ સુધરવાનું નામ નથી લઈ રહ્યા છે. ત્યારે ઉનામાં પણ એસીબીએ છટકું ગોઠવીને PSIના વચેટીયાને લાંચ લેતા ઝડપી પાડ્યો છે. એક જાગૃત નાગરિકે ફરિયાદ કરતા ઉના એસીબીની ટીમ દ્વારા છટકું ગોઠવવામાં આવ્યું હતું અને ટ્રેપમા PSIના વચેટિયાને ઝડપી પાડ્યો હતો અને આ મામલે વધુ તપાસ હાથ ધરવામાં આવી છે.
બનાવની જાણવા મળતી વિગતો મુજબ ઉના પો.સ્ટે. ખાતે નોંધાયેલ પ્રોહીબિશનના ગુનામાં આરોપીને માર ન મારવા માટે તેમજ ગુનામાં ફરીયાદીનુ નામ આરોપી તરીકે નહી ખોલવાના અવેજ પેટે PSI એચ. કે. વરુ દ્વારા ફરિયાદી પાસેથી 5 લાખ રૂપિયાની લાંચ માંગવામાં આવી હતી. બાદમાં, લાંબી રકઝક બાદ લાંચની રકમ 5 લાખથી ઘટાડીને 1 લાખ નક્કી કરવામાં આવી હતી.
લાંચની રકમ ફરીયાદી આપવા માંગતા ન હતા તે માટે એ.સી.બી.ના ટોલ ફ્રી નંબર ૧૦૬૪ ઉપર સંપર્ક કર્યો હતો અને સમગ્ર મામલે ફરિયાદી દ્વારા જિલ્લા ACBમાં ફરિયાદ કરવામાં આવી હતી. જિલ્લા ACB દ્વારા ઉનામાં ટ્રેપ ગઠવીને PSIનો વચેટીયો વિજય જેઠવા લાંચની રકમ લેતાં ઝડપાયો હતો જ્યારે PSI એચ. કે. વરુ નાસી છૂટવામાં સફળ થયો હતો.