અમદાવાદમાં માત્ર 15 દિવસમાં હેલ્મેટ વગરના પાસેથી ૧.૩૧ કરોડનો દંડ વસુલાયો

રાજ્યમાં અને ખાસ કરીને અમદાવાદમાં વધી રહેલ અકસ્માતોને લઈ થોડા દિવસ પહેલા હાઈકોર્ટે ચિંતા વ્યક્ત કરી હતી. હાઈકોર્ટે કહ્યું હતુ કે અમદાવાદ શહેરમાં વાહન ચાલકો હેલ્મેટ પહેરતા જ નથી. વધુમાં હાઈકોર્ટે કહ્યું કે અત્યારે અમદાવાદની સ્થિતિ મુંબઈ જેવી થઈ ગઈ છે. રાત્રે 3 વાગ્યા સુધી રસ્તાઓમાં મોટી સંખ્યામાં અવર જવર રહે છે. હેલ્મેટ અંગે તથા ટ્રાફિકની સમસ્યા મામલે પોલીસની કામગીરી પર પણ હાઇકોર્ટે સવાલો ઉઠાવ્યા હતા.

અમદાવાદ શહેરમાં ટ્રાફિકની સમસ્યા મામલે ટ્રાફિક પોલીસે હાઇકોર્ટમાં સોગંદનામુ રજૂ કર્યુ છે. 01 ઓગસ્ટ 2024 થી 15 ઓગસ્ટ 2024 સુધી કરાયેલી કામગીરી નો વિસ્તૃત અહેવાલ કોર્ટના રેકોર્ડ પર મુકાયો છે. જેમાં અમદાવાદમાં ટ્રાફિકની સમસ્યા સતત વધી રહી હોવાનો ટ્રાફિક પોલીસે કોર્ટમાં સ્વીકાર કર્યો છે. સતત વધતી સમીક્ષાનું મોનિટરિંગ અને સમાધાન પણ ચાલતું હોવાની ટ્રાફિક પોલીસે કબુલાત કરી છે.

મહત્વની વાત એ છે કે 15 દિવસમાં પોલીસે ગેરકાયદે પાર્કિંગ બદલ 11,974 ગુના નોંધ્યા છે. જેની સામે 60.09 લાખનો દંડ વસુલ્યો છે. ગેરકાયદે પાર્કિંગ બદલ 3,338 વાહનોને ટો કરવામાં આવ્યા છે. જે બદલ 22,94,700 નો દંડ વસૂલ કરવામાં આવ્યો છે. જે પૈકી 236 ગુના નોંધવામાં આવ્યા છે, જે ભારતીય ન્યાય સંહિતાની કલમ 285 હેઠળ નોંધવામાં આવ્યા છે. ટ્રાફિક નિયમો તોડનાર લોકો સામે 71 ગુના નોંધાયા છે.

હાઇકોર્ટે ટકોર કરતા કહ્યું હતુ કે હેલ્મેટ વિનાના લોકોને દંડવવામાં આવે છે પરંતુ તેમ છતાં કોઈ હેલ્મેટ પહેરતું જ નથી તેનો શું અર્થ ? હાઈકોર્ટે સમસ્યા અંગે આગામી 15 દિવસમાં ટુ વ્હિલર વાહન ચલાવનાર અને પાછળ બેસનારને બંનેને હેલ્મેટ ફરજિયાત કરવા હુકમ કર્યો હતો. સાથે જ ટ્રાફિક અને રોંગ સાઈડ આવતા વાહનોને કંટ્રોલ કરવાનો આદેશ આપ્યો હતો. જે પછી ટ્રાફિક પોલીસે કરેલી કામગીરીનું સોગંદનામુ હાઇકોર્ટમાં રજૂ કરવામાં આવ્યુ છે.