અમિત શાહના ફેક વીડિયો મામલે 2 આરોપીની ધરપકડ : જુઓ ફેક અને રિયલ વિડીયો
હાલ દેશમાં ચુંટણીનો માહોલ ચાલી રહ્યો છે. ચૂંટણીના માહોલ વચ્ચે અનેક લોકોના ફેક વિડીયો વાયરલ થઈ રહ્યા છે. ત્યારે ફેક વિડીયોનો શિકાર કેન્દ્રીય ગૃહમંત્રી અમિત શાહ પણ બન્યા હતા. અમિત શાહનો એક વીડિયો સોશિયલ મીડિયા પર ઝડપથી વાયરલ થઈ રહ્યો છે. આ વીડિયો આરક્ષણ સંબંધિત હતો. આ વીડિયોને લઈને તેમના વિરોધીઓ તેમના પર નિશાન સાધતા હતા. ત્યારે આ મામલે ગુજરાત પોલીસને મોટી સફળતા મળી છે.
કેસમાં આજરોજ બે આરોપીની ધરપકડ કરવામાં આવી છે. આ મામલે અમદાવાદ સાઈબર ક્રાઈમ બ્રાન્ચની ટીમે કોંગ્રેસના ધારાસભ્ય જિજ્ઞેશ મેવાણીના પીએ સહિત બે લોકોની ધરપકડ કરી છે. જ્યારે બીજો વ્યક્તિ આમ આદમી પાર્ટીનો નેતા હોવાનું કહેવાય છે. અમિત શાહની બે જાહેરસભાનો વીડિયો એડિટ કરી ખાસ એજન્ડા હેઠળ વાયરલ કરાયો હતો.
Edited vs original video of @AmitShah pic.twitter.com/If8KwvDxrA
— Sarma (@sarmagarimella) April 29, 2024
ગુજરાત પોલીસના અમદાવાદ શહેરના ડીસીપી સાયબર ક્રાઈમ ડો.લવિના સિન્હાએ જણાવ્યું કે, અમદાવાદ સાયબર ક્રાઈમે ગૃહમંત્રી અમિત શાહના ભાષણને તોડી મરોડીને કરીને સોશિયલ મીડિયા પર પોસ્ટ કરવાના કેસમાં બે આરોપીઓની ધરપકડ કરી છે. જેમાં કોંગ્રેસના વડગામના ધારાસભ્ય જીગ્નેશ મેવાણીના પીએ સતીશ વાંસોલા અને AAP કાર્યકર આરબી બારિયાનો સમાવેશ થાય છે. સિન્હાએ કહ્યું કે બંનેની વિરુદ્ધ IPC 153, 153A, 171G, 469, 5050 (1)bની કલમો હેઠળ ધરપકડ કરવામાં આવી છે.
ફેક વીડિયો કેસમાં ઘણા રાજ્યોના લોકો સામેલ
ફેક વીડિયો શેર કરવાના કેસમાં ઉત્તર પ્રદેશમાં સમાજવાદી પાર્ટીના એક લોકસભાના ઉમેદવાર અને ઝારખંડના એક નેતાને નોટિસ પાઠવી પૂછપરછ માટે બોલાવાયા છે. આ ઉપરાંત નાગાલેન્ડના નેતાને પણ નોટિસ મોકલાઈ છે. આ તમામને પોતાનો મોબાઈલ સાથે લાવવા આદેશ અપાયો છે. મળતા અહેવાલો મુજબ દિલ્હી પોલીસે તેલંગણાના મુખ્યમંત્રી રેડ્ડી સહિત છ લોકોને પૂછપરછ માટે બોલાવ્યા છે. એડિટેડ વીડિયોના કેસમાં ઘણા રાજ્યોના લોકો સામેલ છે.
