RCBમાંથી મેક્સવેલની `એક્ઝિટ’ નિશ્ચિત !
૨૦૨૫ની સીઝનમાં અન્ય ટીમમાંથી રમતો જોવા મળી શકે
આઈપીએલ-૨૦૨૫ અનેક રીતે ખાસ બની રહેવાની છે કેમ કે આઈપીએલ-૨૦૨૫ માટે મોટી હરાજી આ વર્ષના ડિસેમ્બર અથવા તો આવતાં વર્ષે ફેબ્રુઆરીમાં થશે જેમાં અનેક ખેલાડી બીજી ટીમમાં જઈ શકે છે આવામાં રોયલ ચેલેન્જર્સ બેેંગ્લુરુમાં પણ ફેરફાર થઈ શકે છે. મોટી હરાજી પહેલાં ગ્લેન મેક્સવેલે એક મોટું પગલું ઉઠાવ્યું છે. તેણે બેંગ્લુરુના ઈન્સ્ટાગ્રામ પેઈઝને અનફૉલો કરી દીધું છે.
મેક્સવેલના આ ચોંકાવનારા પગલાંથી ક્રિકેટ જગતમાં હલચલ મચી ગઈ છે અને અટકળો વહેતી થઈ છે કે તે આઈપીએલમાં બેંગ્લુરુનો સાથ છોડી દેશે. આઈપીએલ-૨૦૨૧ની હરાજીમાં ૧૪.૨૫ કરોડ રૂપિયાની ભારે ભરખમ કિંમતે ખરીદાયેલો મેક્સવેલ રોયલ ચેલેન્જર્સ બેંગ્લુરુ માટે મહત્ત્વનો ખેલાડી સાબિત થયો છે. આઈપીએલ-૨૦૨૩માં તેણે શાનદાર ફોર્મ બતાવતાં ૧૪ મેચમાં ૪૦૦ રન બનાવ્યા હતા. જો કે આઈપીએલ-૨૦૨૪માં તેનું પ્રદર્શન અત્યંત ખરાબ રહ્યું હતું જેમાં તેણે ૧૦ મેચમાં માત્ર બાવન રન જ બનાવ્યા હતા.
મેક્સવેલ આઈપીએલની અત્યાર સુધીમાં ૧૩૪ મેચ રમ્યો છે જેમાં ૧૫૬.૭૩ના સ્ટ્રાઈક રેટથી ૨૭૭૧ રન બનાવ્યા છે જેમાં ૧૮ ફિફટી સામેલ છે. બોલિંગમાં તેણે ૩૭ વિકેટ મેળવી છે.
