બાળકોએ જાહેર કરી ટી-૨૦ વર્લ્ડકપ માટે ન્યુઝીલેન્ડ ટીમ !
પત્રકાર પરિષદમાં મટિલ્ડા-એંગસ નામના બાળકે તમામ ખેલાડીઓના નામ જાહેર કર્યા
ન્યુઝીલેન્ડ ક્રિકેટ બોર્ડના અભિગમના ચારે બાજુ વખાણ
આઈસીસી દ્વારા નિર્ધારિત સમયમર્યાદાના બે દિવસ પહેલાં ન્યુઝીલેન્ડ ક્રિકેટ બોર્ડે ટી-૨૦ વર્લ્ડકપ માટે ૧૫ ખેલાડીઓની ટીમ જાહેર કરી છે. કેન વિલિયમસનના નેતૃત્વમાં ન્યુઝીલેન્ડે સ્ટાર ખેલાડીઓથી ભરપૂર ટીમ પસંદ કરી છે. આ ટીમમાં ફિન એલન, ટે્રન્ટ બોલ્ટ, ડેવોન કૉન્વે, ડેરિલ મીચેલ જેવા દિગ્ગજ ખેલાડીઓ સામેલ છે. જો કે ટીમની જાહેરાત જે પ્રમાણે થઈ તેણે ક્રિકેટ અને સોશ્યલ મીડિયાની દુનિયાને આશ્ચર્યચકિત કરી દીધી છે. ન્યુઝીલેન્ડ ક્રિકેટે પાછલા વર્ષે ભારતમાં રમાયેલા વન-ડે વર્લ્ડકપ માટે જે પ્રકારે ટીમનું એલાન કર્યું હતું તેનાથી પણ સૌ ચોંકી ઉઠ્યા હતા.
સોશ્યલ મીડિયા પર શેયર થયેલા વીડિયોમાં ન્યુઝીલેન્ડ ક્રિકેટ બોર્ડે ટીમની જાહેરાત કરવા માટે યોજાયેલી પત્રકાર પરિષદમાં બે બાળકોને મોકલ્યા હતા. એંગસ નામનો એક બાળક અને મટિલ્ડા નામની એક બાળકી પત્રકાર પરિષદમાં સામેલ થયા હતા. આ બન્નેએ તમામ ખેલાડીઓના નામ જાહેર કર્યા હતા !
અગાઉ પાછલા વર્ષે રમાયેલા વન-ડે વર્લ્ડકપ માટે કિવિ ખેલાડીઓની પત્નીઓ અને પરિવારના અન્ય સભ્યોએ ટીમનું એલાન કર્યું હતું. ન્યુઝીલેન્ડ ક્રિકેટ બોર્ડે એક વીડિયો શેયર કર્યો હતો જેમાં એ ખેલાડીઓની પત્ની, પાર્ટનર, બાળકો અને પરિવારના અન્ય સભ્યો સામેલ હતા જેમણે વન-ડે વર્લ્ડકપ માટે પસંદ કરાયા હતા. આ ખાસ અંદાજને દુનિયાએ પસંદ કર્યો હતો. હવે ફરીવાર આવું કર્યું છે.
ન્યુઝીલેન્ડ ટીમ
કેન વિલિયમસન (કેપ્ટન), ફિન એલન, ટે્રન્ટ બોલ્ટ, માઈકલ બ્રેસવેલ, માર્ક ચેપમૈન, ડેવોન કૉન્વે, લોકી ફર્ગ્યુસન, મેટ હેનરી, ડેરિલ મીચેલ, જીમી નીશમ, ગ્લેન ફિલિપ્સ, રચિન રવીન્દ્ર, મીચેલ સેન્ટનર, ઈશ સોઢી, ટીમ સાઉધી.
