ટૂંક સમયમાં ચાની ચુસકી પડશે મોંઘી?
આ વખતે ચાના ઉત્પાદનમાં ઘટાડો થતા ચાના ભાવ વધવાની સંભાવના સામે આવી છે. જો આમ થશે તો સવારની ચા કડવી બને એવી વકી છે.
ઉત્તર ભારતીય ચા ઉદ્યોગ પ્રતિકૂળ હવામાનને કારણે ચાલુ પાક વર્ષ જૂન સુધીમાં છ કરોડ કિલો ઉત્પાદનની અછતનો સામનો કરી રહ્યો છે. સુત્રોના જણાવ્યાનુસાર ગયા વર્ષના આ સમયગાળાની તુલનાએ દેશમાં ચાનું ઉત્પાદન ઘટી રહ્યું છે. અધિકારીઓનું કહેવું છે કે પહેલો અને બીજો પાક વર્ષની સૌથી ઊંચી ગુણવત્તાવાળી ચા પેદા કરે છે. એના નષ્ટ થવાથી ચા ઉત્પાદકોની આવક પર પ્રતિકૂળ અસર પડશે, જેથી ચાની કિંમતો વધે એવી શક્યતા છે.
આસામ અને પશ્ચિમ બંગાળ સહિત ઉત્તર ભારતનાં રાજ્યોમાં ભીષણ ગરમી અને વરસાદની અછતને કારણે ચાના ઉત્પાદનને માઠી અસર પહોંચી છે, જેને પગલે ચાના ઉત્પાદનમાં નોંધપાત્ર ઘટાડો થયો છે. ઇન્ડિયન ટી એસોસિયેશન (TAI)ના અધ્યક્ષ સંદીપ સિંઘાનિયાએ જણાવ્યું હતું ગયા વર્ષની તુલનામાં જૂન સુધી ચાના સંયુક્ત પાકનું નુકસાન છ કરોડ કિલોગ્રામ થાય એવી શક્યતા છે.
