સો ટચની શુદ્ધતામાં રાજકોટની સોની બજારએ રચ્યો રેકોર્ડ: હોલમાર્ક સેન્ટરને એવોર્ડ

દેશના 1500 હોલમાર્ક સેન્ટરમાંથી રાજકોટના વી.જી.ગોલ્ડને શુદ્ધતા માટે કેન્દ્ર સરકાર દ્વારા એવોર્ડ

રાજકોટની સોની બજાર માટે સુવર્ણ ઈતિહાસ રચાયો છે. સોનાની શુદ્ધતા અને ગુણવત્તા ના ટેસ્ટ માટે દેશભરમાંથી એકમાત્ર રાજકોટના હોલમાર્ક સેન્ટરને કેન્દ્ર સરકાર દ્વારા એવોર્ડ એનાયત કરવામાં આવ્યો છે. તાજેતરમાં મુંબઈ ખાતે યોજાયેલા વિશ્વ માનક દિવસની ઉજવણી દરમિયાન દેશના તમામ હોલમાર્ક સેન્ટરોના ટેસ્ટ કરવામાં આવ્યા હતા જેમાં ફાઇનલ રાઉન્ડમાં ગુજરાતનો એકમાત્ર રાજકોટમાંથી વી.જી.ગોલ્ડ અને અન્ય શહેરોના મળી કુલ પાંચ સેન્ટરો પહોંચ્યા હતા છેવટે ફાઇનલ રાઉન્ડના અંતે રાજકોટમાં 20 વર્ષથી કાર્યરત વી.જી.ગોલ્ડને ભારતીય માનક બ્યુરો દ્વારા આ એવોર્ડ આપવામાં આવ્યો હતો.

આ કાર્યક્રમમાં ખાસ ઉપસ્થિત રહેલા અને હોલમાર્ક સેન્ટરની સ્થાપના કરનાર તેમજ રાજકોટ ગોલ્ડ ડીલર્સ એસોસિએશનના પ્રમુખ ભાયાભાઈ સાહોલિયા એ રાજકોટનો આ એવોર્ડ સ્વીકાર્યો હતો.

સમગ્ર દેશમાં 1500 જેટલા હોલમાર્ક સેન્ટર છે જેમાં સોનાની શુદ્ધતા અને ગુણવત્તાના ટેસ્ટ કરવામાં આવ્યા છે. હાલના સમયમાં નકલી હોલમાર્ક સેન્ટરોનો રાફડો ફાટ્યો છે ત્યારે તેને વિશ્વસનીયતા સામે સવાલો ઉભા થતા હોય છે ત્યારે રાજકોટ જ નહીં પરંતુ સૌરાષ્ટ્ર કચ્છમાં વી.જી.ગોલ્ડએ પોતાની સર્વશ્રેષ્ઠ કામગીરીથી ઝવેરીઓમાં સો ટચ સોના જેવી છાપ અંકિત કરી છે. અગાઉ પણ એક્સાઇઝની લડતમાં ગોલ્ડ ડીલર એસોસિએશનના પ્રમુખ ભાયાભાઈ સાહોલીયાએ નેતૃત્વ લઈને સફળ પરિણામ મેળવ્યું હતું.