મચ્છર જેમ લોહી ચૂસે તેમ સાગઠિયાએ બિલ્ડરો-પ્રજાના પૈસા ચૂસ્યા’તા…વાંચો કેટલા રુપયા મળ્યા
૧૫ કરોડનું સોનું, ૩ કરોડ રોકડા, ૧૦ લાખના હિરા-ચાંદી અને બીજું ઘણું બધું…
૧૫૦ ફૂટ રોડ પર ટવીન ટાવર નામની સાગઠિયાની ઑફિસમાંથી ૧૮ કરોડનો ખજાનો' કબજે કરતું એસીબી
આટલી કિંમતી જણસ આવી ક્યાંથી ? સવાલ એક, ચર્ચા અનેક !!
ટીઆરપી ગેઈમ ઝોન અગ્નિકાંડના ગેરકાયદેસર ધમધમાટ પાછળ મહાપાલિકાની ટાઉન પ્લાનિંગ શાખાના તત્કાલિન ટીપીઓ એમ.ડી.સાગઠિયાની મુખ્ય જવાબદારી ફિક્સ કરીને તેને પકડી લેવામાં આવ્યા બાદ હવે તેની બેનામી મિલકતો જપ્ત કરવાનું શરૂ કરવામાં આવ્યું છે. એસીબીએ ગત તા.૧૯ જૂને સાગઠિયા સામે દસ કરોડથી વધુની બેનામી મિલકત વસાવવા બદલ ગુનો નોંધ્યા બાદ તેની તપાસ આગળ ધપાવતાં સાગઠિયાની ૧૫૦ ફૂટ રિંગરોડ ઉપર ટવીન ટાવરમાં આવેલી ઓફિસમાં દરોડો પાડી ચેકિંગ કરતાં ત્યાંથી ૧૮ કરોડ રૂપિયાના સોનાના દાગીના, બિસ્કિટ, મોંઘીદાટ ઘડિયાળ, રોકડ સહિતનો
ખજાનો’ મળી આવ્યો હતો !
એસીબીએ ૧ જૂલાઈએ સાંજે ૭:૫૦ વાગ્યે સાગઠિયાનો જેલમાંથી કબજો લઈ રાત્રીના સમયે જ ટવીટ ટાવરમાં ઑફિસ નં.૯૦૧માં દરોડો પાડીને ચેકિંગ શરૂ કર્યું હતું. આ વેળાએ સાગઠિયાને પણ સાથે રાખવામાં આવ્યો હતો. અહીંથી એસીબીને પાસવર્ડ પ્રોટેક્ટ લોકર મળી આવ્યું હતું જેને ખોલતાંની સાથે જ સાગઠિયાનો ખજાનો પકડાઈ ગયો હતો.
લોકરમાંથી એસીબીને ૨૨ કિલો સોનાના દાગીના-બિસ્કિટ કે જેની કિંમત ૧૫ કરોડ રૂપિયા જેવી થવા જાય છે તે ઉપરાંત અઢી કિલો ચાંદીના દાગીના, ૮.૫૦ લાખના હિરાજડિત ઘરેણા, ૩,૦૫,૩૩,૫૦૦ની રોકડ, ૧,૮૨,૦૦૦ની અલગ-અલગ દેશની ચલણી નોટ તેમજ સોનાના પટ્ટાવાળી ૨ ઘડિયાળ અને ૬ અન્ય કિંમતી ઘડિયાળ કે જેની કિંમત ૧,૦૩,૧૦૦ જેટલી થવા જાય છે તે મળી કુલ ૧૮ કરોડનો બેનામી મુદ્દામાલ મળી આવતાં તેને કબજે કરી લેવામાં આવ્યો છે.
અત્રે એ ઉલ્લેખ કરવો પણ જરૂરી છે કે સાગઠિયા પાસે આટલી રોકડ, સોનાના બિસ્કિટ સહિતની જણસ આવી ક્યાંથી તેનો ખુલાસો થવો જોઈએ કેમ કે સાગઠિયાએ આ બધું દૂધ વેચીને તો વસાવ્યું જ નથી તે વાત એકદમ સ્પષ્ટ છે એટલા માટે એસીબીએ આ ખજાનો આખરે ક્યાંથી આવ્યો તેના મુળમાં જઈને દૂધનું દૂધ અને પાણીનું પાણી કરવું જોઈએ.