PDM ફાટકે ફાઈલમાં `કેદ’ અન્ડરબ્રિજ બહાર નીકળ્યો: 46 મિલકતો કપાત થશે
530 મીટરનો `ઝેડ’ આકારનો બ્રિજ બનશે જેની ઉંચાઈ 15 ફૂટ, પહોળાઈ 50 ફૂટ, લંબાઈ 530 મીટર હશે
મહિલા કોલેજ બ્રિજની જેમ રેલવેના પાટા નીચે 37 મીટરનું બોક્સ આવશે જેમાંથી વાહનો પસાર થશે
ગોપાલનગર-1ના ખૂણેથી કપાત શરૂ થશે: ટેન્ડર, કપાત સહિતની પ્રક્રિયા ઝડપથી પૂર્ણ કરવા કમિશનરની સુચના
મહાપાલિકા દ્વારા 13 જૂને જામનગર રોડ પરનો સાંઢિયા બ્રિજ શરૂ કર્યા બાદ હવે બીજા બ્રિજનું કામ હાથ પર લઈ લેવામાં આવ્યું છે. આ બ્રિજ અન્ડરબ્રિજ હશે જે પીડીએમ ફાટક પાસે `ઝેડ’ આકારમાં બનવાનો છે. આશ્ચર્યની વાત એ છે કે આ બ્રિજ છેલ્લા નવ મહિનાથી ફાઈલમાં જ `કેદ’ હતો. ગુજરાત અર્બન ડેવલપમેન્ટ કંપની (જીયુડીસી) દ્વારા ગત વર્ષની 22 ઓગસ્ટે જ 40.83 કરોડ રૂપિયાની ગ્રાન્ટ ફાળવી દીધા છતાં કામ શરૂ ન થયાનો અહેવાલ `વોઈસ ઓફ ડે’ દ્વારા પ્રસિદ્ધ કરાતાં જ પ્રોજેક્ટ ફાઈલમાંથી નીકળ્યો છે અને કામ શરૂ કરી દેવામાં આવ્યું છે. આ બ્રિજ બનાવવા માટે ગોપાલનગર-1ના ખૂણેથી કપાત શરૂ થશે અને કપાતમાં 46 મિલકતો આવતી હોવાનું જાણવા મળ્યું છે.
આ અંગે વધુમાં જાણવા મળ્યા પ્રમાણે આ અન્ડરબ્રિજ 530 મીટરની લંબાઈનો હશે. જે પ્રમાણે મહિલા કોલેજ અન્ડરબ્રિજ બનાવવામાં આવ્યો છે જેમાં ઉપર પાટા અને નીચેથી વાહનો પસાર થઈ શકે તે જ પ્રકારે અહીં બ્રિજ બનશે. જમીનથી પાટા વચ્ચેનું અંતર 15 ફૂટનું રહેશે મતલબ કે 15 ફૂટની ઉંચાઈ રહેશે અને તેના માટે 37 મીટરનું બોક્સ મુકવામાં આવશે. મહાપાલિકા દ્વારા બ્રિજ માટે કુલ 4565 ચોરસમીટર જમીન સંપાદિત કરવામાં આવશે. બ્રિજની પહોળાઈ 50 ફૂટની હશે.
આ બ્રિજ ગોંડલ રોડ પર કાંતા સ્ત્રી વિકાસ ગૃહ નજીક આવેલા હ્યુન્ડાઈ કંપનીના શો-રૂમથી શરૂ થઈ ઢેબર રોડના ખૂણે ગોપાલનગર-1માં પૂર્ણ થશે. હાલ લાઈન ઓફ પબ્લીક સ્ટ્રીટ હેઠળ કપાત કરવાની પ્રક્રિયા શરૂ કરી દેવામાં આવી છે સાથે સાથે મ્યુનિસિપલ કમિશનર દ્વારા બ્રિજનું ટેન્ડર ઝડપથી પ્રસિદ્ધ કરવા સહિતના મુદ્દે પણ જવાબદાર અધિકારીઓને આદેશ આપવામાં આવ્યો છે.
