ગાંધી જયંતિએ રાજકોટના વેપારીઓએ સ્કેનરને કાળુ કપડુ ઢાંકી `નો યુપીઆઇ ડે’ મનાવ્યો
રાજ્યના ૬૦૦થી વધુ ટે્રડર્સ યુનીયને હડતાળ મોકુફ રાખી પણ વિરોધ નોંધાવ્યો
કેન્દ્ર સરકાર દ્વારા ઓનલાઇન ૨૦૦૦થી વધુના ટે્રન્ઝેકશન પર ૦.૪ ટકા ટેક્સ લાદી દેવામાં આવતા દેશભરના વેપારીઓમાં ભારે રોષ જોવા મળી રહ્યો છે. ત્યારે ગાંધી જયંતીએ `નો યુપીઆઇ ડે’ હેઠળ વેપારીઓએ ઓનલાનિ પૈસા સ્વીકારવાનો ઇન્કાર કર્યા બાદ છેલ્લી ઘડીએ હડતાળ મોકુફ રાખવામાં આવી હતી. પરંતુ રાજ્યના તમામ વેપારીઓએ `નો યુપીઆઇ ડે’ જાહેર કરી ક્યુઆર કોડ પર કાળુ કપડું ઢાંકી વિરોધ નોંધાવ્યો હતો.
૨૦૦૦ના ઓનલાઇન પેમેન્ટ પર ૦.૪ ટકા વેપારીઓને ટેક્સ ચુકવવો પડશે તેવા કેન્દ્ર સરકારના નાણા વિભાગના આદેશ સામે દેશભરમાં ભારે વિરોધ જોવા મળી રહ્યો છે. ત્યારે આજે ગાંધી જયંતી નિમિત્તે `નો યુપીઆઇ પેમેન્ટ’ હેઠળ વિરોધ પ્રદર્શીત કરવાનો નિર્ણય લેવામાં આવ્યો હતો.
જેમાં ગુજરાતના ૬૦૦ ટે્રડસ યુનિયનો દ્વારા એક દિવસ ઓનલાઇન પેમેન્ટ સ્વીકારવાનો ઇન્કાર કરી વિરોધ કરવાની જાહેરાત કરી હતી. જો કે, છેલ્લી ઘડીએ હડતાળ મોકુફ રાખવામાં આવી હતી.
આમ છતાં રાજકોટ સહિત રાજ્યભરના વેપારીઓએ આજે `નો યુપીઆઇ ડે’ નિમિત્તે ક્યુઆર કોડ કે સ્કેનર પર કાળુ કપડુ ઢાંકી વિરોધ નોંધાવ્યો હતો.
રાજકોટના ધર્મેન્દ્ર રોડ, ગુંદાવાડી, લાખાજીરાજ રોડ, કાલાવાડ રોડ, યુની. રોડ, સાધુ વાસવાણી રોડ સહિતના વિસ્તારોમાં પાનની દુકાન, કરીયાણાના વેપારી, રેસ્ટોરન્ટ, નાસ્તાની રેકડી, પેટ્રોલ પંપ સહિતના સ્થળોએ આજે ક્યુઆર કોડ અને સ્કેનર પર કાળુ કપડુ ઓઢાડી વિરોધ કરવામાં આવ્યો હતો.
વેપારીઓએ જણાવ્યું હતું કે, પહેલ છુટ્ટા બાબતે ગ્રાહકો સાથે માથાકુટ થતી હતી પરંતુ ડિજિટલ પેમેન્ટ આવ્યા બાદ છુટ્ટાની મગજમારીમાંથી છુટકારો મળ્યો હતો. એટલું જ નહીં ગ્રાહકોને પણ વોલેટમાં રૂપિયા રાખવાની ઝંઝટમાંથી મુક્તિ મળી ગઇ હતી.
પરંતુ કેન્દ્ર સરકારના નવા ફતવાના કારણે વેપારીઓને નફામાં નુકશાની જતી હોય જેમાં યુપીઆઇ પેમેન્ટનો વ્યાપક ઉપયોગ થતો હોય વેપારીઓને વધારાનો ટેક્સ ચુકવવા પડે તેમ હોય તેની સામે વિરોધ પ્રદર્શીત કર્યો હતો.
વેપારીઓએ વધુમાં ઉમેર્યુ હયું કે એમ.ડી.આર. લાગુ થવાની તેમના વ્યવસાયના ખર્ચમાં વધારો થઇ શકે છે. જે ખર્ચ અંતે તો ગ્રાહકોને જ ભોગવવાનો વારો આવશે. વેપારીઓ કોઇપણ ચીજવસ્તુની કિંમતમાં ૦.૪ ટકા ઉમેરીને જ પેમેન્ટ સ્વીકારશે.
