જૂની કલેકટર કચેરીમાં કનેક્ટિવિટી ખોરવાતા રેશનકાર્ડધારકોમાં દેકારો

ઓનલાઇન કામગીરી બંધ થઈ જતા આવકના દાખલા અને રેશનકાર્ડ માટે આવેલા સેંકડો અરજદારો હેરાન પરેશાન થયા, 12 વાગ્યા બાદ રાબેતા મુજબ

રાજકોટ : રાજકોટની જૂની કલેકટર કચેરી ખાતે આવેલ ઝોનલ-1 પુરવઠા કચેરી, તાલુકા મામલતદાર પુરવઠા કચેરી અને એટીવીટી સેન્ટરમાં કલાકો સુધી ઇન્ટરનેટની કનેક્ટિવિટી ખોરવાઈ જતા રેશનકાર્ડમાં સુધારા વધારા કરાવવાં માટે આવેલા અરજદારો તેમજ આવકના દાખલા મેળવવા આવેલા અરજદારોને કલાકો સુધી કતારમાં ઉભા રહેવું પડતા મેળા જેવા માહોલમાં અરજદારોમાં દેકારો બોલી ગયો હતો.

સરકારની આરટીઈ યોજનાની પ્રક્રિયા શરૂ થતા હાલમાં રાજકોટની પુરવઠા વિભાગની ઝોનલ કચેરીઓમાં તેમજ એટીવીટી સેન્ટરમાં અરજદારો આવકના દાખલ તેમજ રેશનકાર્ડમાં સરનામાં સહિતના સુધારા વધારા માટે લાઈનો લગાવી રહ્યા છે તેવા સમયે જ બુધવારે કારખાનામાં રજાનો દિવસ હોય જૂની કલેકટર કચેરીની ઝોનલ-1 કચેરી તેમજ તાલુકા મામલતદારની પુરવઠા કચેરીમાં અરજદારોએ લાઈનો લગાવી હતી પરંતુ કચેરી શરૂ થતાની સાથે જ ઇન્ટરનેટ કનેક્ટિવિટી ખોરવાઈ જતા કલાકો સુધી અરજદારો કતારમાં ઉભા રહેવા મજબુર બન્યા હતા.

બીજી તરફ પુરવઠાની ઝોનલ કચેરીની સાથો સાથે આવકના દાખલ કાઢવાની કામગીરી જ્યાં કરવાં આવે છે તેવા એટીવીટી સેન્ટરમાં પણ કનેક્ટિવિટી ખોરવાઈ જતા અરજદારોને લોઢા શેક કરવો પડ્યો હતો જો કે, બાદમાં બારેક વાગ્યાના અરસામાં ઇન્ટરનેટ કનેક્ટિવિટી પુનઃ સ્થાપિત થતા અરજદારોની કલાકોની હેરાનગતિ બાદ કામગીરી થઇ શકી હતી.