રાજનગર ચોકમાં સાઈડ દેવા બાબતે યુવતી સહિત ત્રણ ઉપર જાહેરમાં હુમલો

ટ્રાફિક સિગ્નલે યુવક અને યુવતીએ દાદાગીરી કરી વાળ પકડી મહિલાને રોડ ઉપર ઢસડી

રાજકોટના રાજનગર ચોક પાસે એક ટ્રાફિક સિગ્નલ ઉપર સાઈડ દેવા બાબતે એક યુવતી અને તેના બેન અને બનેવી ઉપર એક યુવક અને યુવતીએ સરા જાહેર હુમલો કરી જ્ઞાતિ પ્રત્યે હડધૂત કરતાં આ મામલે મલાવીયાનગર પોલીસમાં ફરિયાદ નોંધાઈ હતી. યુવતીએ હુમલાખોર બન્ને યુવક યુવતીનો સામનો કરી પોલીસને જાણ કરતાં પીસીઆરે બન્નેની સ્થળ ઉપર થી ધરપકડ કરી પોલીસ સ્ટેશને લાવી કાર્યવાહી કરી હતી.

નાનામવા સર્કલ ખીજડાવાળો રોડ પટેલ પાનની બાજુમાં ગીરનાર સોસાયટી શેરીનં.૬માં રહેતી અને રાજકોટની એક ફૂડ કંપનીમાં એડમીન તરીકે નોકરી કરતી મૂળ કાલાવડની પુજા લાલજીભાઇ ચૌહાણને કાલાવડ જાવાનું હોય પરસાણાનગર જ્યોતિ પાર્કમાં રહેતા ફોટોગ્રાફી કરતાં બનેવી નીલ વાઘેલા અને બહેન આરતી વાઘેલા ત્રિપલ સવારી તેને બસ સ્ટેશને મુકવા જતા હતા. પૂજાની એક બેગ રૂમ ઉપર ભુલાઇ જતા રસ્તામાંથી પરત રૂમ ઉપર જતા હતા ત્યારે રાજનગર ચોકે ટ્રાફીક સીગનલ બંધ હતુ ઉભા હતા અને વળવાનું હતું આગળ સ્કૂટર નંબર જીજે03-એમએ-2421અને જીજે10એકયું 2908 સિગ્નલ બંધ હોય ડાબી બાજુ ટર્ન લેવાના રસ્તામાં વચ્ચે ઊભા હોય બન્નેને હોર્ન વગાડી સાઇડમાં ઉભુ રહેવાનું કહેતા યુવક યુવતીએ દાદાગીરી કરી ઝગડો કરી પૂજાબેન અને તેના બનેવી નીલ અને બહેન આરતી ઉપર સરા જાહેર હુમલો કરી વાળ પકડી જાહેરમાં રોડ ઉપર ઢસડી હતી અને આરતીનો મોબાઈલ પણ તોડી નાખ્યો હતો અને જ્ઞાતિ પ્રત્યે હડધૂત કર્યા હતા. હુમલો કરી બન્ને ભગવા જતા પૂજાબેને તેના સ્કૂટરની ચાવી કાઢી લઈ પોલીસ કંટ્રોલને જાણ કરી હતી. મલવિયાનગર પોલીસની પીસીઆર ઘટના સ્થળે પહોંચી હતી અને મારમારી કરનાર યુવક અને યુવતીને પોલીસ મથકે લાવવામાં આવ્યા હતા તપાસમાં તેના નામ યોગેશ અને પ્રિયંકા હોવાનું જાણવા મળ્યું હતું. પોલીસ પૂજાની ફરિયાદને આધારે બન્ને સામે એસ્ટ્રોસીટી અને મારામારીની ફરિયાદ નોંધી ધરપકડ કરી હતી.