શીતલ પાર્ક પાસે રોયલ મેળા’માં ફરવા જજો, કશું ખાતાં નહીં !
મેળો પૂરો થવા આવ્યો'ને મનપાને ચેકિંગ કરવાનું સૂઝ્યું: વાસી પોટેટો રિંગનો મસાલો, ભૂંગળા-બટેટા સહિતનો નાશ
રાજકોટમાં જન્માષ્ટમી નિમિત્તે યોજવામાં આવતાં ખાનગી મેળાઓ હવે પૂર્ણ થવા આવ્યા છે પરંતુ મહાપાલિકાની ફૂડ શાખાને પ્રારંભે નહીં બલ્કે અંતમાં ચેકિંગ કરવામાં રસ હોય તેવી રીતે ૧૫૦ ફૂટ રોડ પર શીતલ પાર્ક પાસેરોયલ જન્માષ્ટમી’ મેળામાં ચેકિંગ કરતાં ત્યાંથી અખાદ્ય પદાર્થનો જથ્થો મળી આવતાં સ્થળ પર જ તેનો નાશ કરવામાં આવ્યો હતો.
ફૂડ શાખાના ચેકિંગમાં છ કિલો વાસી પોટેટો રિંગનો મસાલો, ત્રણ કિલો મંચુરિયન, પાંચ કિલો ભૂંગળા-બટેટા સહિતનો ૧૪ કિલો અખાદ્ય પદાર્થનો જથ્થો મળી આવતાં સ્થળ પર જ તેનો નાશ કરાયો હતો. આ ઉપરાંત લાખના બંગલાવાળા રોડ પર પાણીપૂરી તેમજ ફાસ્ટફૂડનું વેચાણ કરતાં વેપારીઓને ત્યાં તપાસ કરાતાં શુભ દાબેલીમાંથી પાંચ કિલો વાસી ચટણી, સંતોષ ભેળ એન્ડ પાણીપૂરીમાંથી સાત લીટર વાસી પાણીપૂરીનું મીઠું પાણી, આશાપુરા ચાઈનીઝ એન્ડ પંજાબીમાંથી છ કિલો વાસી મંચુરિયન મળી કુલ ૧૮ કિલો અખાદ્ય પદાર્થ પકડીને તેને ફેંકી દેવાયો હતો. જ્યારે ૫૦ ફૂટનો ખીજડાવાળો રોડ, વિશ્વનગરમાં આવેલા હરભોલે ફરસાણમાં તપાસ કરતાં ખાદ્યવસ્તુના પેકેટ ઉપર કોઈ પ્રકારની માહિતી ન દર્શાવેલી હોવાથી તેને નોટિસ ફટકારાઈ હતી. જ્યારે ૨૦ ધંધાર્થીઓનું ચેકિંગ કરતાં આઠ પાસે લાયસન્સ ન હોવાને કારણે તેને નોટિસ અપાઈ હતી.
ગણેશોત્સવ અડધો પૂરો થયો’ને મોદકના સેમ્પલ લેવાયા
મોડે મોડેથી જાગવા માટે જાણીતી ફૂડ શાખાએ ગણેશોત્સવ અડધો પૂરો થઈ ગયા બાદ મોદકના સેમ્પલ લીધા છે ! સંતકબી રોડ પર ગજાનંદ જોધપુર સ્વીટ એન્ડ ફરસાણ, વિશ્વનગરમાં હરભોલે ફરસાણ, ત્યાંથી જ તીખા ગાંઠીયા અને સેવ (લૂઝ)નો નમૂનો લઈને સેમ્પલ પરિક્ષણ અર્થે લેબોરેટરીમાં મોકલવામાં આવ્યા છે.
