જૂનાગઢ કૃષિ યુનિવર્સિટીમાં દીપડો ઘૂસી જતા ભય ફેલાયો
રેસ્ક્યુ બાદ વન વિભાગે મૂર્છિત કરીને જંગલમાં છોડી દીધો
જૂનાગઢની કૃષિ યુનિવર્સિટીના બાયો એનર્જી લેબોરેટરીમાં વહેલી સવારે દીપડો ઘૂસી જતા અફડાતફડી મચી હતી પરંતુ જૂનાગઢ વન વિભાગની ટીમે દીપડાને બેહોશીનુ ઇન્જેક્શન આપીને ઝડપી લીધો હતો અને દીપડાને સક્કરબાગ ઝૂ ખાતે લઇ ગયા બાદ જંગલમાં છોડી મુક્યો હતો.
જૂનાગઢની કૃષિ યુનિવર્સીટી માં આવેલ બાયો એનર્જી લેબોરેટરીમાં દરરોજની જેમ આજે પણ સવારે વિદ્યાર્થીઓ આ બાયો એનર્જી લેબોરેટરી માં આવ્યા ત્યારે એક વિદ્યાર્થીની નજર પડી કે હોલના ખૂણા માં એક દીપડો બેઠો હતો, તુરંત વિદ્યાર્થીએ શાંતિથી લેબની બહાર નીકળીને બહારથી દરવાજો બંધ કરી દીધો હતો અને કોલેજના પ્રિન્સિપાલને જાણ કરી હતી. આ પછી વન વિભાગને જાણ કરવામાં આવી હતી. આ દીપડાની ઉમર અંદાજે બે થી અઢી વર્ષ હોવાનું જણાયું હતું, દોઢ કલાકની જહેમત બાદ સકકરબાગ ઝૂના વેટરનરી ડૉ. રિયાઝ કડીવારે બેહોશીનું ઇન્જેક્શન ગનના ડાર્ટ દ્વારા મારવામાં આવ્યું હતું અને થોડીવારમાં દીપડો બેભાન થઇ જતા તેને સક્કરબાગ ઝૂ ખાતે લઇ જવાયો હતો જ્યાં દીપડાનું હેલ્થ પરીક્ષણ કર્યા બાદ ફરીથી જંગલમાં છોડી મુકવામાં આવ્યો હતો.
