રાજકોટમાં રોગચાળો બેફામ: 21 વર્ષિય યુવાનનું ઝાડા ઉલ્ટીથી મોત
રાજકોટમાં રોગચાળો બેફામ બન્યો છે. રોગચાળાએ માંજા મુકી હોય તેમ ઘરેઘરે માંદગીના ખાટલા જોવા મળી રહ્યાં છે. રોગચાળો જીવલેણ નિવડયો છે રૈયાધાર વિસ્તારમાં રહેતા અને શો રૂમમાં કામ કરતાં 21 વર્ષિય યુવાનનું ઝાડા ઉલ્ટી થતાં સારવાર દરમિયાન મોત નિપજ્યું હતું. પરિવારના એકના એક પુત્રના મોતથી માતા-પિતા સહિતના પરિવારજનો શોકમાં ગરકાવ થઈ ગયા હતાં.
રૈયાધાર મફતીયાપરામાં રહેતા અકીલ ફિરોજભાઈ પિંજારા (ઉ.21) નામના યુવાનને ઝાડા ઉલ્ટી થતાં સારવાર માટે સિવિલ હોસ્પિટલમાં ખસેડવામાં આવ્યો હતો. જ્યાંથી વધુ સારવાર માટે ખાનગી હોસ્પિટલમાં ખસેડાયો હતો.અને ટૂંકી સારવાર દરમિયાન તેનું મોત નિપજ્યું હતું. મૃતક અકીલ તેના માતા-પિતાનો એકનો એક પુત્ર હોવાનું અને હોન્ડાના શોરૂમમાં નોકરી કરતો હોવાનું જાણવા મળ્યું છે.
