ડીઝલ ચોરી કૌભાંડ અનેક પોલીસને દઝાડશે!!
પોલીસને કલંકિત કરતી સનસનાટીજનક રેડની તપાસ જખઈને સોંપતા ઉૠ
પકડાયેલો કોન્સ્ટેબલ ભરત મિયાત્રા `કુખ્યાત’ પિતરાઇ સાથે મળીને દરરોજ ચોરાઉ ડીઝલ વેચતો ને કરતો ત્રણેક લાખની કમાણી
કોલસા-ડીઝલ સહિતની ચોરીમાં મોટી રકમ મળતી હોવાથી દાઢ ડળકી: ટ્રકના ડ્રાઈવરોને પણ લિટર દીઠ પૈસા ચૂકવાતા: ટૂંક સમયમાં જ સ્ટેટ મોનિટરિંગ સેલ કૌભાંડમાં સંડોવાયેલા લોકોને કરશે બેનકાબ
મોરબી પોલીસના માથે ક્યારેય ન ભૂંસાય તેવું કલંક એક કોન્સ્ટેબલે લગાવી દીધું છે ! સ્ટેટ મોનિટરિંગ સેલે માળિયા-જામનગર હાઈ-વે પર વીરપરડા ગામે આવેલી ઓમ બન્ના હોટેલ પર દરોડો પાડીને છેલ્લા સાત મહિનાથી ચાલતી ડીઝલ ચોરીનું મસમોટું કૌભાંડ પકડી પાડ્યું હતું. આ કૌભાંડ પોલીસની ભાગીદારીમાં જ ચાલતું હોવાનું ખુલતાં ચકચાર મચી ગઈ હતી સાથે સાથે સ્થળ પરથી એસએમસીએ પોલીસ કોન્સ્ટેબલની ધરપકડ કરતાં પોલીસ બેડામાં સોપો પડી ગયો હતો.
દરમિયાન આ રેડ પડ્યા બાદ સમગ્ર મામલાની તપાસ રાજ્ય પોલીસવડા વિકાસ સહાયે સ્ટેટ મોનિટરિંગ સેલને સોંપતાં ટૂંક સમયમાં જ આ કૌભાંડ અનેક પોલીસ કર્મીને દઝાડી દેશે તે વાત નિશ્ચિત છે.આ અંગે સ્ટેટ મોનિટરિંગ સેલે કરેલી પ્રારંભીક તપાસમાં એવો ખુલાસો થયો છે કે સ્થળ પરથી પકડાયેલો કોન્સ્ટેબલ કે જે મોરબી હેડ ક્વાર્ટરમાં છેલ્લા સાતેક મહિનાથી ફરજ બજાવી રહ્યો હતો તેણે તેના પિતરાઈ ભાઈ કે જે કુખ્યાત છે અને રેડની જાણ થતાં જ નાસી જવામાં સફળ રહ્યો છે તેવા ભાવેશ ઉર્ફે મુન્નો પ્રભાતભાઈ ધ્રાંગા સાથે મળીને ડીઝલ ચોરીનું સુવ્યવસ્થિત કૌભાંડ ચલાવી રહ્યો હતો.
આ બન્ને ઉપરાંત પકડાયેલી રાજસ્થાની ટોળકી દરરોજ ચોરાઉ ડીઝલ વેચીને જ ત્રણેક લાખ રૂપિયાની કમાણી કરી લેતા હોવાનું ધ્યાન પર આવ્યું છે. સૂત્રોએ જણાવ્યું કે કોલસા-ડીઝલ સહિતની ચોરીમાં મોટી રકમ મળતી હોવાથી ભરત અને તેના ભાઈની દાઢ ડળકી હતી અને બન્નેએ ચોરી શરૂ કરી હતી. આ બન્ને કંપનીમાંથી પેટ્રોલ-ડીઝલ ભરીને આવતાં ટ્રક ડ્રાયવરોને સાધી લેતા હતા અને તેમને લીટરદીઠ પૈસાનું ચૂકવણું કરતા હતા. હવે ટૂંક સમયમાં જ સ્ટેટ મોનિટરિંગ સેલ આ કૌભાંડમાં સંડોવાયેલા અન્ય લોકોને બેનકાબ કરી દેશે.
ભરતે પીવા માટે બીયરના ૮ ટીન સાથે રાખ્યા’તા
સ્ટેટ મોનિટરિંગ સેલે રેડ પાડી તે સ્થળ ઓમ બન્ના હોટેલના મેદાનમાં ડીઝલ ચોરી તો ચાલી જ રહી હતી બરાબર ત્યારે જ કૌભાંડમાં ભાગીદાર એવો કોન્સ્ટેબલ ભરત પ્રતાપભાઈ મીયાત્રા ત્યાં કારમાં ધસી આવ્યો હતો. આ પછી તેની પણ ધરપકડ કરી તેની ગાડીની તલાશી લેવામાં આવતાં તેમાંથી બીયરના આઠ ટીન મળી આવ્યા હતા જેનો અલગથી ગુનો નોંધવામાં આવ્યો છે. આ બીયરના ટીન ભરત પીવા માટે લાવ્યો હોવાનું રટણ કરી રહ્યો છે.