રાજકોટ આઈઓસીના પમ્પ સ્ટેશનમાં બોમ્બ મુકાયો

આસિસ્ટન્ટ કલેક્ટર અને મહેક જૈન, ડિઝાસ્ટર મામલતદાર, એસઓજી, ક્રાઇમબ્રાન્ચ અને બૉમ્બ ડિસ્પોઝલ ટીમ બનાવ સ્થળે

રાજકોટના ઇન્ડિયન ઓઇલ કોર્પોરેશનના પમ્પ સ્ટેશન પરિસર ખાતે બોમ્બ મુકવામાં આવ્યો હોવાનું સામે આવતા સિક્યુરિટી ગાર્ડે આઇઓસીએલ કંટ્રોલરૂમને જાણ કરતા જ તુરત જ પોલીસ અને બૉમ્બ ડિસ્પોઝલ સ્ક્વોડ તેમજ ડિઝાસ્ટર મેનેજમેન્ટ વિભાગની ટીમો બનાવ સ્થળે દોડી ગયા હતી જો કે, સમગ્ર ઘટનાને મોકડ્રિલ જાહેર કરવામાં આવતા સંબંધિત વિભાગોએ હાશકારો અનુભવ્યો હતો. આ મોકડ્રિલમાં તમામ વિભાગો સમયસર બનાવસ્થળે પહોંચી જતા મોકડ્રિલ કામગીરીને બિરદાવવામાં આવી હતી.

ઇન્ડિયન ઓઇલ કોર્પોરેશનના રાજકોટ પમ્પ સ્ટેશન પરિસરની અંદર શંકાસ્પદ વસ્તુ જોવામાં આવતા કોન્ટ્રાક્ટ વર્કર દ્વારા સિક્યોરિટી ગાર્ડને જાણ કરી હતી અને સિક્યોરિટી ગાર્ડે કંટ્રોલ રૂમમાં ફોન કરતા કંટ્રોલ રૂમ દ્વારા ચીફ ઓપરેશન મેનેજર હેમંત ભારદ્વાજે પોલીસને જાણ કરી હતી.ઓપરેશન મેનેજરે એ પરિસ્થિતિનું મૂલ્યાંકન કરવા બોમ્બ થ્રેટ એસેસમેન્ટ કમિટીનું નેતૃત્વ કર્યું અને સ્થળની મુલાકાત કરતાં, શંકાસ્પદ વસ્તુ બોમ્બ હોવાની શક્યતા જાણતાં પોલીસ કંટ્રોલ રૂમને જાણ કરી હતી બાદમાં બોમ્બ ડિટેક્શન અને ડિસ્પોઝલ સ્ક્વોડ, ડિઝાસ્ટર વિભાગના તમામ સરકારી અધિકારીઓ અને અલગ અલગ પોલીસ વિભાગો તેમની ટીમ સાથે મોકડ્રીલ સ્થળ પર પહોંચી ગયા હતા. જ્યાં BDDS ટીમે તેમના ટૂલ્સ અને ડોગ સ્ક્વોડ સાથે પહોંચી બોમ્બનું નિરીક્ષણ કરી બાદ તેને ડિફ્યુઝ કર્યો હતો.

મોકડ્રિલ સમયે જિલ્લા સત્તાધિકારી, IOCL ટીમ, SOG ટીમ, QRT ટીમ, BDDS ટીમ, કુવાડવા પોલીસ સ્ટેશનની ટીમ વચ્ચે ઉત્તમ સંકલન દ્વારા મોકડ્રીલ સફળતાપૂર્વક હાથ ધરવામાં આવી હતી. આ તકે આસિસ્ટન્ટ કલેક્ટર અને રાજકોટ શહેર પ્રાંત -2  મહેક જૈન, આઇઓસીએલના સુજીત કુમાર, રાજકોટ તાલુકા મામલતદાર મકવાણા, ડિઝાસ્ટર મામલતદાર હિમાંશુ ચૌહાણ, એસઓજી પીઆઇ એસ.એમ. જાડેજા, ક્રાઇમ બ્રાન્ચ પી આઇ એમ.એન. ડામોર હાજર રહ્યા હતા.