રાજકોટ : સસ્તા અનાજના વેપારીઓ વિવિધ માંગણીઓ ન સંતોષાતા કલેકટર કચેરી ખાતે રજુઆત કરવા પહોંચ્યા..જુઓ

રાજકોટ સહિત રાજ્યના સસ્તા અનાજના 17 હજાર જેટલા વેપારીઓ તા.1 સપ્ટેમ્બરથી હળતાલ ઉપર જતાં ગરીબોના તહેવાર બગડ્યા છે. તહેવાર નિમિત્તે વધારાની ખાંડ તેમજ તેલ વિતરણ શક્ય નહિ બને. ગુજરાત રાજ્ય ફેર પ્રાઇઝ શોપના આગેવાનો તેમજ રાજકોટ સસ્તા અનાજના પરેવાનેદારોએ જિલ્લા પુરવઠા અધિકારીને મળી વિવિધ પડતર માંગ બાબતે પોતાની મુખ્યમંત્રી સુધી પહોંચાડવા રજૂઆત કરી હતી આવેદન આપ્યું હતું.

આ તબક્કે સસ્તા અનાજના વેપારીઓએ જણાવ્યું હતું કે, જ્યાં સુધી પડતર માંગણીઓનું નિરાકરણ નહિ આવે ત્યાં સુધી નિગમના ગોડાઉનમાંથી અનાજનો જથ્થો ઉપાડવામાં નહિ આવે. દરમિયાન રાજકોટ સસ્તા અનાજના હોદ્દેદાર અને માવજીભાઈ રાખશિયાએ જણાવ્યું હતું કે, સરકારે ચુંટણી પહેલા પડતર પ્રશ્નોનું નિરાકરણ લાવવાની ખાતરી આપી હતી. જે બાબતે આજ સુધી એક પણ માંગ સ્વીકારવામાં આવી નથી. જેથી અમારે ના છૂટકે 1 લી સપ્ટેમ્બરથી અચોક્કસ મુદત સુધીની હળતાલ પર જવું પડ્યું છે. જય સુધી જૂની માંગણીઓ સ્વીકારવામાં નહિ આવે ત્યાં સુધી રાજ્યની એકપણ સસ્તા અનાજની દુકાનના દરવાજા નહિ ખૂલે. વધુમાં ઉમેર્યું હતું કે, આગામી દિવસોમાં પુરવઠા નિગમના ગોડાઉનમાં કોઈપણ દિવસે અનાજની ગુણીમાંથી થતી ચોરીને ખુલ્લી પાડવામાં આવશે. આમાં સરકારની છબી ખરડાઇ તો એસોસીશનની કોઈ જવાબદારી નહિ રહે. અત્રે ઉલ્લેખનીય છે કે, વર્ષ 2022ના ઓગસ્ટમાં દુકાનદારોના પડતર પ્રશ્ને સરકારને અલ્ટિમેટમ આપવામાં આવ્યું હતું ત્યારે તત્કાલીન અન્ન અને નાગરિક પુરવઠા વિભાગના કેબિનેટ મંત્રી નરેશ પટેલની અધ્યક્ષતામાં એસોસિએશનને માસિક રૂ.20 હજારનું મહેનતાણું તેમજ કમિશનની દરખાસ્ત મંજૂર કરવાનું વચન આપ્યું હતું. તેમજ વિતરણની ઘટ એક તકો મંજૂર કરવાનું નક્કી કર્યા બાદ આજ સુધી તેનો અમલ થયો નથી.