રાજકોટ : મવડીમાં રહેતી પરિણીતાનું ડેંગ્યુથી મોત

આઠ દિવસ તાવ આવ્યા બાદ રાત્રિના સરધાર ખાતે રહેતા ભાઈના ઘરે બેભાન થતાં જીવ ગયો : એક વર્ષની બાળકીએ માતાની છત્રછાયા ગુમાવી 

રાજકોટમાં રોગચાળા વકર્યો છે.દિન-પ્રતિદિન ડેંગ્યુના કેસોમાં વધારો જોવા મળી રહ્યો છે.જ્યારે ડેંગ્યુની બીમારીથી ઘણા લોકોના જીવ પણ ગયા છે.ત્યારે ડેંગ્યુએ વધુ એક મહિલાનો જીવ લીધો છે.મવડીમાં પંચશીલનગરમાં રહેતી પરિણીતાને આઠ દિવસથી તાવ આવતો હતો.ગઇકાલે તેણી સરધાર ગામે તેના ભાઈના ઘરે હતી.ત્યારે બેભાન થતાં તેનો જીવ જતાં આરોગ્ય તંત્રમાં દોડધામ મચી જવા પામી છે.

વધુ વિગતો મુજબ, મવડી ગામે પંચશીલનગર શેરી નં.2માં રહેતી રૂપાબેન ભોલાભાઈ ગોલતર (ઉ.28) નામની પરિણીતા સરધાર ગામે તેના ભાઈ ગોપાલભાઈ ગમારાના ઘરે હતી ત્યારે અચાનક બેભાન થઈ જતાં સારવાર માટે સિવિલ હોસ્પિટલમાં ખસેડવામાં આવી હતી. જ્યાં તેનું ટૂંકી સારવાર દરમિયાન મોત નિપજ્યું હતું. આ અંગે આજી ડેમ પોલીસે તપાસ કરતાં જાણવા મળ્યું હતું કે, મૃતક પરિણીતાના પતિને વાવડી ગામે ચાની હોટલ આવેલી છે અને તેને સંતાનમાં એક પુત્રી છે. છેલ્લા સાત દિવસથી પરિણીતાને ડેંગ્યુ થયો હોય સારવાર શરૂ હતી. દરમિયાન તેના ભાઈના ઘરે રોકાવા માટે આવી ત્યારે બેભાન થઈ જતાં તેનું ડેંગ્યુની બિમારીથી મોત નિપજ્યું હતું. આ બનાવથી એક વર્ષની બાળકીએ માતાની છત્રછાયા ગુમાવી દેતાં પરિવારમાં ગમગીની છવાઈ જવા પામી છે.