હરિયાણા : EDએ કોંગ્રેસના ધારાસભ્યની કરી ધરપકડ, ગેરકાયદે ખનનનો આરોપ
- હરિયાણામાં સોનેપતના કોંગી ધારાસભ્યની મની લોન્ડરીંગ કેસમાં ઇડી દ્વારા ધરપકડ
- એક જ દિવસમાં વિવિધ રાજ્યોના ચાર કોંગી નેતાઓ સામે ઇડીની કાર્યવાહી
હરિયાણામાં સોનેપતના કોંગી ધારાસભ્ય સુરેશ પનવારની ઇડીએ યમુનાનગર અને રાજ્યના અન્ય વિસ્તારોમાં ગેરકાયદે ખનન બાબતે મની લોડરીંગ કેસ અંતર્ગત ધરપકડ કરી હતી.
ગત જાન્યુઆરીમાં આ મામલે ઇડી એ ધારાસભ્ય પનવારના મળતીયાઓ, ભાજપના નેતા મનોજ વાધવા અને આઈએનએલડી ના ધારાસભ્ય દિલ બાગ સિંધના યમુનાનગર તેમજ કરનાલમાં આવેલા ઠેકાણાઓ પર દરોડા પાડ્યા હતા અને સિંહની પૂછપરછ કરવામાં આવી હતી.ધારાસભ્ય પનવારે 2022 ના જુલાઈ મહિનામાં તેમના પરિવારની સલામતી ઉપર જોખમ હોવાનું જણાવી ધારાસભ્ય પદેથી રાજીનામું આપી દીધું હતું પરંતુ અધ્યક્ષએ સલામતીની ખાતરી આપતા રાજીનામું પરત ખેંચી લીધું હતું.
ઇડી પૂરી તાકાતથી મેદાનમાં
ઇડી એ રાજસ્થાનના જળ જીવન મિશન કૌભાંડ સંદર્ભે શુક્રવારે ભૂતપૂર્વ મંત્રી મહેશ જોશીના નજીકના સાથી સંજય બાદાયાની ધરપકડ કરી હતી. અન્ય એક બનાવમાં ₹1,390 કરોડના બેંક લોન કૌભાંડમાં ઇડીએ હરિયાણાના કોંગી ધારાસભ્ય રાવ દાન સિંઘના નિવાસ્થાન,ફાર્મ હાઉસ તથા અન્ય ઠેકાણા ઉપર દરોડા પાડ્યા હતા. આ ઉપરાંત કર્ણાટકના વાલ્મિકી કોર્પોરેશન કાંડમાં હાલમાં જેલવાસ ભોગવી રહેલા પૂર્વ મંત્રી બી નાગેન્દ્રના પત્ની મંજુલા ની પણ શુક્રવારે ઇડીએ પૂછપરછ માટે અટકાયત કરી હતી.
