ફ્લેટના બ્રોશર માત્ર માર્કેટિંગ નહીં, કાયદેસરના વચન છે: સુપ્રીમ કોર્ટ!

ઘર ખરીદતી વખતે બિલ્ડરો દ્વારા બ્રોશરમાં આકર્ષક સુવિધાઓ અને સપનાઓ બતાવવામાં આવતા હોય છે, પરંતુ પઝેશન વખતે વાયદાઓ પૂરા ન થવાની ફરિયાદો આમ બની ગઈ છે. આ જ મુદ્દે સુપ્રીમ કોર્ટે રિયલ એસ્ટેટ સેક્ટરને કડક ચેતવણી આપતા સ્પષ્ટ કર્યું છે કે બ્રોશર એ માત્ર માર્કેટિંગ દાવા નથી, પણ કાયદેસરના વચનો છે.

પ્રોજેક્ટ બ્રોશર અને નકશા અંગે સુપ્રીમ કોર્ટની કડક ટિપ્પણી

સુપ્રીમ કોર્ટે રિયલ એસ્ટેટ ડેવલપર્સને આડે હાથ લેતા જણાવ્યું છે કે બિલ્ડરો પ્રોજેક્ટ વેચતી વખતે ગ્રાહકોને જે વાયદા કરે છે અને નકશા બતાવે છે, તે જમીન પર પૂરા કરવા જ પડશે. માત્ર ‘માર્કેટિંગ ક્લેઇમ’ કહીને ડેવલપર્સ પોતાની જવાબદારીમાંથી હાથ ખંખેરી શકે નહીં. જો બ્રોશર મુજબ સુવિધાઓ નહીં અપાય, તો કોર્ટ દ્વારા કડક આદેશો આપવામાં આવશે.

DLFના ‘ધ પ્રાઇમસ’ પ્રોજેક્ટમાં ગેરરીતિ અને CBI તપાસ

જસ્ટિસ અહસાનુદ્દીન અમાનુલ્લાહ અને જસ્ટિસ આર મહાદેવનની ખંડપીઠ ગુરુગ્રામના DLF હોમ ડેવલપર્સના ‘ધ પ્રાઇમસ’ પ્રોજેક્ટના વિવાદની સુનાવણી કરી રહી હતી. મૂળ પ્લાન મુજબ અહીં 24 મીટર પહોળો એપ્રોચ રોડ બનવાનો હતો, પરંતુ CBI તપાસમાં ખુલાસો થયો કે આ યોજનાના આશરે 100 મીટર જેટલા હિસ્સામાં (બે તૃતીયાંશ ભાગમાં) ગ્રીન પેચ (બગીચો) અને પાર્કિંગ બનાવી દેવામાં આવ્યા છે. કોર્ટે આ મામલે CBI તપાસ વધુ કડક બનાવવા નિર્દેશ આપ્યો છે.

આ પણ વાંચો: ભારતીયો માટે EB-1 ગ્રીન કાર્ડ બંધ થવાની આરે! ટ્રમ્પ સરકારની ચેતવણી.

મધ્યમવર્ગીય ગ્રાહકોની સ્થિતિ પર કોર્ટની ચિંતા

કોર્ટે અગાઉ નોંધ્યું હતું કે કાગળ પરના નિયમો અને જમીન પરની વાસ્તવિકતા વચ્ચે મોટો તફાવત છે. જો આખા રિયલ એસ્ટેટ સેક્ટરમાં આ જ રીતે ગ્રાહકો સાથે છેતરપિંડી થતી રહેશે, તો સામાન્ય મધ્યમવર્ગીય ઘર ખરીદદારોની હાલત કફોડી બની જશે.

આગામી સુનાવણી અને આખરી રિપોર્ટ

સુપ્રીમ કોર્ટે CBI ડાયરેક્ટરને આ પ્રાથમિક તપાસમાં વધુ બે ઇન્સ્પેક્ટરોની મદદ લેવા સૂચના આપી છે. આ કેસની આગામી સુનાવણી 12 ઓક્ટોબરના રોજ હાથ ધરવામાં આવશે, જ્યાં એજન્સી દ્વારા પોતાનો આખરી રિપોર્ટ રજૂ કરવામાં આવશે.

આમ, સુપ્રીમ કોર્ટનો આ કડક આદેશ એ તમામ બિલ્ડરો અને રિયલ એસ્ટેટ કંપનીઓ માટે લાલબત્તી સમાન છે જેઓ ગ્રાહકોને આકર્ષક સપના બતાવીને વાયદાઓ પૂરા નથી કરતા. આ ચૂકાદાથી મકાન કે ફ્લેટ ખરીદનારા સામાન્ય ગ્રાહકોના હિતોનું રક્ષણ વધુ મજબૂત બનશે.