અમેરિકાના નિવેદન અંગે ભાજપ જૂઠાણા ફેલાવે છે ; રાહુલ ગાંધી

• રહી રહીને આપી પ્રતિક્રિયા; પોતાના ભાષણનો વિડીયો પણ સોશ્યલ મીડિયા પર શેર કરી ચોખવટ કરી

રાહુલ ગાંધીના અમેરિકા પ્રવાસને લઈને ભાજપના નેતાઓ તેમના પર સતત પ્રહાર કરી રહ્યા છે. ભાજપનો આરોપ છે કે, રાહુલ ગાંધીએ અનામત અને શીખો અંગે વિવાદાસ્પદ નિવેદન આપ્યું છે. હવે આ મુદ્દે પહેલી વખત રાહુલ ગાંધીએ શનિવારે સ્પષ્ટતા આપી હતી અને કહ્યું હતું કે ભાજપ અમેરિકામાં આપેલા મારા નિવેદન અંગે જૂઠ્ઠાણું ફેલાવી રહી છે.

10 સપ્ટેમ્બરના રોજ રાહુલ ગાંધીએ વોશિંગ્ટન ડીસીમાં એક સભાને સંબોધિત કરતા કહ્યું હતું કે, ભારતમાં શીખોને પાઘડી કે કડું પહેરવાની મંજૂરી આપવામાં આવશે કે નહીં અથવા શીખોને ગુરુદ્વારામાં જવાની મંજૂરી આપવામાં આવશે કે કેમ તે મુદ્દે ભારતમાં લડાઈ ચાલી રહી છે. અને આ તમામ ધર્મો માટે છે.

રાહુલ ગાંધીના નિવેદનને લઈને ભાજપ સતત કોંગ્રેસ પર નિશાન સાધી રહી છે. ભાજપનું કહેવું છે કે કોંગ્રેસના સાંસદે શીખોનું અપમાન કર્યું છે. એટલું જ નહીં કેન્દ્રીય મંત્રી રવનીત સિંહ બિટ્ટુએ તો રાહુલ ગાંધીને દેશના સૌથી મોટા આતંકવાદી ગણાવી દીધા છે. આ સમગ્ર વિવાદ વચ્ચે રાહુલ ગાંધીએ સોશિયલ મીડિયા હેન્ડલ X પર પોતાના 10 સપ્ટેમ્બરના ભાષણનો વીડિયો અટેચ કરીને ભાજપ પર પલટવાર કર્યો હતો. આ મુદ્દે હજુ પણ નિવેદન બાજી ચાલુ જ રહી શકે છે.