ડેમોક્રેટિક રિપબ્લિક ઓફ કોંગોમાં આગ લગતા 26 વિદ્યાર્થીના મોત: જીવ બચાવવા બાળકો બારીમાંથી કૂદી પડ્યા!

જ્યારે શિક્ષણના મંદિરો અચાનક મોતના કુવામાં ફેરવાઈ જાય છે, ત્યારે સમગ્ર માનવતા હચમચી જાય છે. કોંગોના પૂર્વ શહેર બુકાવુમાં ગુરુવારનો દિવસ એક કાળરાત્રિ બનીને આવ્યો, જ્યાં પાડોશના ઘરમાંથી ફેલાયેલી આગે બે સ્કૂલોને પોતાની ઝપેટમાં લઈ લીધી. નાની વયના માસૂમ બાળકો માટે આ આફત એટલી અચાનક આવી કે તેમને સંભળાવવાનો પણ મોકો ન મળ્યો.

કોંગોની બે શાળાઓમાં ભીષણ આગથી હાહાકાર

કોંગોના પૂર્વ શહેર બુકાવુમાં ગુરુવારે એક અત્યંત દર્દનાક દુર્ઘટના સર્જાઈ હતી. અહીં એક ઘરમાં લાગેલી આગ અચાનક આસપાસના ગીચ વિસ્તારમાં ફેલાઈ ગઈ અને નજીકની બે શાળાઓ સુધી પહોંચી ગઈ હતી. આ ભીષણ આગ અને ત્યારબાદ મચેલી નાસભાગમાં કુલ ૨૬ વિદ્યાર્થીઓનાં કરુણ મોત નીપજ્યાં છે, જ્યારે અનેક વિદ્યાર્થીઓ ગંભીર રીતે ઘાયલ થયા છે.

પાડોશના લાકડાના ઘરોમાંથી ફેલાઈ વિકરાળ આગ

સ્થાનિક વહીવટી તંત્રના જણાવ્યા અનુસાર, આગની શરૂઆત સૌપ્રથમ નજીકના એક ઘરમાં થઈ હતી. આ વિસ્તારમાં વસ્તી ખૂબ જ ગીચ છે અને મોટાભાગના મકાનો લાકડાના બનેલા હોવાના કારણે આગે પળભરમાં જ વિકરાળ સ્વરૂપ ધારણ કરી લીધું હતું. જોતજોતામાં આ ભીષણ આગ તેની આજુબાજુ આવેલી ફુરાહા સેકેન્ડરી સ્કૂલ અને ઉજામા પ્રાઇમરી સ્કૂલ સુધી પહોંચી ગઈ હતી.

આ પણ વાંચો: વાયદા બજારમાં કિંમતી ધાતુઓની પછડાટ; રોકાણકારો અને ગ્રાહકોની ચિંતા વધી!

૨૬ માસૂમ વિદ્યાર્થીઓનાં દર્દનાક મોત

પ્રાંતિય સરકારના સત્તાવાર આંકડા મુજબ આ ગોઝારી ઘટનામાં કુલ ૨૬ વિદ્યાર્થીઓનાં મોત થયા છે, જેમાં ૧૯ છોકરીઓ અને ૭ છોકરાઓ સામેલ છે. આગ અચાનક ફાટી નીકળવા અને ચારેય બાજુ ધુમાડો થવાના કારણે ગૂંગળામણભર્યું વાતાવરણ સર્જાયું હતું, જેના લીધે કેટલાક વિદ્યાર્થીઓ શાળાની અંદર જ ફસાઈ ગયા હતા અને શ્વાસ રૂંધાવાથી તેમનું મોત થયું હતું.

સાંકડા રસ્તા, ભાગદોડ અને બારીમાંથી કૂદીને બચાવના પ્રયાસો

શાળામાંથી બહાર નીકળવાના રસ્તાઓ અત્યંત સાંકડા હોવાથી આગ લાગ્યા બાદ ભારે અફરા-તફરી અને નાસભાગ મચી ગઈ હતી. જીવ બચાવવા માટે દોડતી વેળાએ કેટલાક વિદ્યાર્થીઓ નીચે પડી ગયા અને ભીડમાં દબાઈ જવાથી પણ તેમનું મૃત્યુ થયું હતું. તો વળી, પોતાની જિંદગી બચાવવા માટે કેટલાક વિદ્યાર્થીઓ શાળાની ઊંચી બારીઓમાંથી નીચે કૂદી પડ્યા હતા, જેના કારણે તેઓ ગંભીર રીતે ઘાયલ થયા હતા.

ઇજાગ્રસ્તોની હોસ્પિટલમાં સારવાર અને રાહત કામગીરી

આગની ઝપેટમાં આવેલા તમામ ઇજાગ્રસ્ત વિદ્યાર્થીઓને તાત્કાલિક ધોરણે સ્થાનિક સ્વાસ્થ્ય કેન્દ્રો અને હોસ્પિટલોમાં ખસેડવામાં આવ્યા છે. એકસાથે મોટી સંખ્યામાં દર્દીઓ પહોંચવાને કારણે તબીબી સ્ટાફને પણ સારવાર આપવામાં મુશ્કેલીઓનો સામનો કરવો પડ્યો છે. હાલમાં ઘટનાસ્થળે રાહત અને બચાવ કામગીરી પૂરજોશમાં ચાલુ છે અને મૃત્યુઆંક હજુ વધવાની ભીતિ વ્યક્ત કરવામાં આવી રહી છે.

આ દુર્ઘટનાએ ગીચ વસ્તીવાળા વિસ્તારોમાં સુરક્ષા અને શાળાઓના બાંધકામની પદ્ધતિ પર ગંભીર સવાલો ઊભા કર્યા છે. માસૂમ બાળકોના આકસ્મિક મૃત્યુથી સમગ્ર વિસ્તારમાં શોકનું મોજું ફરી વળ્યું છે અને આ ભયાનક દુર્ઘટના આખી દુનિયાના હૃદયને હચમચાવી ગઈ છે.