આવતીકાલે ક્યાં થશે બીજા તબક્કાનું મતદાન ? કેટલી બેઠકો માટે થશે ? જુઓ
જમ્મુ – કાશ્મીર વિધાનસભા ચૂંટણીના બીજા તબક્કામાં આજે બુધવારે 6 જિલ્લાની 26 વિધાનસભા બેઠકો પર મતદાન થશે. જેમાં 25.78 લાખ મતદારો પોતાનો મત આપી શકશે. પ્રથમ તબક્કામાં સારું મતદાન રહ્યું હતું.
બીજા તબક્કાની 26 બેઠકોમાંથી 15 બેઠકો મધ્ય કાશ્મીરની અને 11 બેઠકો જમ્મુની છે. ચૂંટણી પંચના જણાવ્યા અનુસાર બીજા તબક્કામાં 239 ઉમેદવારો મેદાનમાં છે. જેમાંથી 233 પુરૂષો અને 6 મહિલાઓ છે.
બીજા તબક્કામાં 131 ઉમેદવારો કરોડપતિ છે અને 49 સામે ફોજદારી કેસ નોંધાયેલા છે. જમ્મુ-કાશ્મીર ભાજપ અધ્યક્ષ રવિન્દર રૈનાએ પોતાની સંપત્તિ માત્ર 1,000 રૂપિયા જાહેર કરી છે.
પૂર્વ મુખ્યમંત્રી અને નેશનલ કોન્ફરન્સના ઉપાધ્યક્ષ ઓમર અબ્દુલ્લા ગાંદરબલ અને બીરવાહથી ચૂંટણી લડી રહ્યા છે. ઓમર લોકસભા ચૂંટણીમાં બારામુલા બેઠક પરથી તિહાર જેલમાંથી ચૂંટણી લડેલા એન્જિનિયર રાશિદ સામે હારી ગયા હતા. . આ વખતે પણ જેલમાં બંધ સર્જન અહેમદ વાગે ઉર્ફે આઝાદી ચાચા ગાંદરબલ સીટ પર તેમની સામે મેદાનમાં છે.
18 સપ્ટેમ્બરે પ્રથમ તબક્કામાં 7 જિલ્લાની 24 વિધાનસભા બેઠકો માટે મતદાન થયું હતું. આ દરમિયાન 61.38% મતદાન થયું હતું. સૌથી વધુ મતદાન કિશ્તવાડમાં 80.20% અને સૌથી ઓછું પુલવામામાં 46.99% હતું.